Francia atrobe cu crisis politico: A manda di cuater premier den 2 aña cas

PARIS - Manera tabata spera, mayoria di e parlamento frances a vota pa kita premier Bayrou dialuna. Esaki ta obliga e pa entrega su retiro na presidente Macron. E situacion aki ta trece cu e crisis politico den pais ta sigui. Bayrou ta e cuater premier den dos aña cu a cay.

Motibo pa kita Bayrou ta e   cortamento grandi di gasto cu el a anuncia den luna di juli. Bayrou kier baha casi 44 biyon euro, y casi tur ministerio lo wordo toca pa esaki. Solamente na defenza e no kier corta.

Deficit di presupues frances ta mas cu 5 porciento di e producto bruto domestico (bbp), cu ta e mas halto den zona euro. Den Union Europeo a acorda cu un pais por tin deficit maximo di 3 porciento. Tambe na nivel di deuda publico, Francia ta den top, solamente Italia y Greco tin un deuda mas halto.

Un deficit grandi ta trece diferente problema, segun expertonan. Francia mester paga semper mas interes pa e prestamonan cu e a tuma. Pago di interes pa gobierno frances a dobra den ultimo cinco aña.

Bayrou ta di dos premier den menos cu nueve luna cu a wordo obliga pa sali. Na desember aña pasa premier Barnier tambe a wordo kita pa oposicion. El a ke pasa un presupues sin aprobacion di parlamento.

Macron por nombra un nobo premier of bisa pa tin eleccion nobo pa parlamento. Cierto partido di oposicion kier cu presidente frances mes tambe bai.