Hulanda tin minister nobo pa Relacionnan den Reino

ORANJESTAD / DEN HAAG - Frank Rijkaart ta e minister nobo encarga cu Asuntonan Interno y Relacionnan den Reino. Esaki e partido politico BBB ("Boer Burger Beweging") a anuncia. Eddie van Marum tambe di BBB ta keda secretario di estado pa Relacionnan den Reino.

Despues cu e gobierno demicionario di Hulanda a bolbe cai na momento cu partido NSC ("Nieuw Sociaal Contract") tambe a sali for di e coalicion, partidonan VVD y BBB mester a yena tur e puestonan di mandatario cu a habri. Esaki ta nesesario mirando cu eleccion ta tuma luga te dia 29 di oktober y cu proceconan di formacion na Hulanda ultimo tempu ta dura bastante largo.

Rijkaart ta reemplasa Judith Uitermark cu tabata minister pa NSC. Rijkaart den pasado tabata un militar di profesion y despues a traha como polis. Despues el a drenta politica y te cu recien tabata diputado pa provincia di "Zuid Holland" encarga entre otro agricultura y nitrogeno.

"Mi ta considera e peticion pa mi bira minister como un responsabilidad grandi", Rijkaart a declara. "Pesei mi ta dal e paso aki, cu apresio pa tur loke nos a logra hunto y cu confianza den tur loke ta nos dilanti. Lo mi sinti falta di tur e hendenan cu mi a topa te ainda y a crea un lazo cune, pero mi ta convence cu lo mi sigui topa cu hopi di nan den futuro."

Partner di coalicion na nivel provincial, CDA no ta muchu contento cu e desishon di Rijkaart pa asumi e funcion di minister. Lider di fraccion di CDA den Staten provincial di "Zuid Holland", Michel Rogier ta bisa cu e ta hopi desapunta. E ta mustra cu Rijkaart tabata responsabel pa algun tema pisa y cu e trabou no ta cla ainda.

"Nos a aproba algun plan bunita, pero awor e ta baha bay. Mi no ta contento cu e situacion aki." BBB a bisa cu pronto e partido lo presenta cu un candidato pa remplasa Rijkaart como diputado. Otro partidonan den Staten tambe ta hasi un apelacion riba BBB pa hasi lihe cu nan candidato nobo. "Nos mester cumpli cu promesanan cu nos a hasi", Sinan Ozkaya (GroenLinks-PvdA) ta bisa.

Uitermark mes a tuma e responsabilidad di minister di Asuntonan Interno y Relacionnan den Reino despues cu partido PVV como prome partner a bandona e coalicion y ocasiona cu gobierno hulandes a cai. Un di e declaracionnan di e ex minister pa NCS den parlamento hulandes cu mas a hala atencion ta ora el a bisa cu e maneho financiero di Corsou, Aruba y St. Maarten ainda no ta na ordo. "Apesar cu ta traha a base di proyecto y estructural riba mehoracion, tasina cu tin retraso den mayoria di e proyectonan. Causa di e retrasonan aki ta principalmente debi na falta di capacidad pa banda di e trabounan regular ehecuta e diferente trayectonan di mehoracion", Uitermark a declara.