Brekelmans: No a usa base na Corsou den operacion di Merca contra Venezuela

DEN HAAG – Merca no a usa e base antes conoci como FOL ( cu awor ta opera como e Cooperative Security Location Aruba-Corsou, den e operacion recien contra Venezuela. Asina e minister di defensa Ruben Brekelmans a contesta miembronan di Tweede Kamer Paternotte, Van Der Werf y Bamenga (tur di partido D66) recientemente. E tabata un lista di 10 pregunta riba e mobilisacion di Merca den e region y e efecto pa e islanan ABC. 

HULANDA NO TA INVOLUCRA

Riba e pregunta si Hulanda tabata envolvi den e operacionan recien, Brekelmans a bisa no. “ Merca ta un di e socio mas importante pa e Reino den combati droga. E uso anuncia ta sin embargo maneha nacionalmente pa e Merca. Reino Hulandes no ta involucra den e plan aki. Na momento, Defensia y Asuntonan di Exterior ta mantene contacto cu e Merca” Brekelmans a sigui bisa.

A USA E BASE ANTES CONOCI COMO FOL?

 Segun e minister, e uso solamente di e base na Corsou, ta toca e Cooperative Security Location si ta trata di operacion den espacio aereo riba Corsou. Riba esaki tin acuerdo den e Tratado entre Reino Hulandes y Merca tocante acceso y uso di facilidadnan den Antia Hulandes y Aruba pa combati droga for di aire . E tratado ta duna permiso pa hasi vuelonan for di Aeropuerto di Corsou pa vigilancia, monitoreo y detecion di transporte di droga. Esaki ta solamente pa vuelonan sin arma. Ademas, e status di personal mericano ta wordo regula den e acuerdo entre Reino Hulandes y Merca tokante e status di personal mericano den parti Caribense di e Reino. Por wak e lista di pregunta completo AKI.