Fraccion AVP: Oposicion kier purba bula for di su propio sombra

ORANJESTAD  – Segun fraccion di partido berde AVP, Oposicion kier purba bula for di su propio sombra. E fraccion ta bisa cu den e siman cu a pasa, “ pueblo di Aruba a mira claramente con oposicion (MEP y PPA) ta sigui opta pa teatro politico, grito y desinformacion”. E realidad segun e fraccion berde, ta cu loke nos ta enfrenta awe no ta nada nobo, sino e consecuencia di decisionnan tuma for di 2018 caba. “ Esey ta ora cu parlamentarionan di MEP mes a bin cu mocion pa cambia e Landsverordening, habriendo caminda pa e trayecto cu nos ta topa awe”. 

Segun AVP, despues, den e mes periodo bou di un gobernacion dirigi pa MEP, no a cumpli cu e condicionnan estableci. “ E falta di cumplimento ey a empeora e situacion y provoca Hulanda pa bin cu un Rijkswet. Ta for di e tempo ey e trein aki a sali y MEP a forsa henter Aruba pa subi, sin alternativa” e fraccion a sigui bisa.  Pa e fraccion berde, e sesion publico di diabierna ultimo tabata un ehempel cla: un sesion cu MEP y PPA a pidi, cu a haya tambe, pero bo ta mira hopi cla cu nan meta nunca tabata pa bin cu algo concreto pa Aruba. “Nan no ta interesa pa lesa y debati serio riba e propuesta di ley, sino pa haci show”. 

Segun e fraccion berde, loke nos ta mira ta cu oposicion tabata mas interesa den grita y interumpi. “Presidente di Parlamento, Marlon Sneek a actua den e limitenan di su autoridad y cu respet pa e institucion, y a pospone e sesion pa duna tempo na tur miembro pa lesa e documento, analisa y bin cu argumento serio den nomber di henter pueblo”.