Venezuela a anuncia patruyahe cu barco di guera y drones

CARACAS (AFP).- Gobiernu di Venezuela ayera a informá patruyahe ku barkunan di guera i drones den su awanan teritorial, na momento ku Merka tambe a anunsiá un despliegue militar den zùit di Karibe komo un operashon kontra di narkotráfiko. E pais ya un dia promé a anunsiá mobilisashon di 15.000 efektivo di su kuerponan di seguridat na frontera ku Colombia i esaki tambe komo operashon anti droga. Esei na momento ku e gobièrnu di Nicolás Maduro a denunsiá un “oumento di akshonnan hostil” di parti di Merka.

Merka a anunsiá e mobilisashon di tres ‘missile destructor’ i 4.000 marinero serka dje límite ku Venezuela. Djamars a informá di otro dos barku, sin ku a duna detaye di nan fecha di yegada.

E minister venezolano di defensa, Vladimir Padrino, a anunsiá den un video riba retnan sosial e “despliegue importante di drones ku diferente mishon, ku puntonan di atenshon siudadano, puntonan di eksplorashon i vigilansia den zona nortwèst di Venezuela.

“Patruyanan naval den lago di Maracaibo, patruyanan naval den golfo di Venezuela i barkunan di karga mas grandi mas ariba parti nort den nos awanan teritorial”.

Merka ta akusá Maduro di ta enkabesá un grupo di narkotráfiko i ta ofresé un rekompensa di 50 mion dollar pa informashon ku por hiba na su kaptura. Maduro a rechasá e akusashonnan ei i a habri e registro militar pa amplia su filanan. Su gobièrnu a eksigí den Nashonnan Uní “e paro inmediato dje despliegue militar norteamerikano den Karibe”, segun nan a bisa den un komunikado. NOTA: Texto ta scirbi den Papiamento fonetico di Corsou.