Homber cu a tira su primo mata, a entrega su mes na husticia

ORANJESTAD – E primo di Rene Paesch cu diasabra mainta a keda tira mortalmente pa un bala, esta Israel Paesch, a entrega su mes diasabra atardi laat na autoridad. E la haci esaki despues di a haci un declaracion na e portal 24ora.com, alegando cu loke a sosode tabata defensa propio contra su primo. E la dicidi di entrega su mes, pero no prome cu e dispidi di su yiu di 8 aña y su mayornan. E la opta pa duna un declaracion exclusivo na e portal 24ora.com, den cual e la duna loke ta su version di e actonan cu a sosode 12 ora prome. Den e declaracion, e ta admiti cu e la tira su primo, pero cu e ta considere acto di defensa propio. Esaki pasobra segun su version, e primo tabata buske problema basta tempo caba y e no por a haci otro. Husticia awor tin cu determina e situacion, y continua cu su investigacion.