Aruba por tuma revancha contra Venezuela awe den semifinal di LLWS 2025

WILLIAMSPORT –  Un aña pasa, Venezuela a gana Aruba 2-1, eliminando nos seleccion for di e torneo. Aruba tabata gana, pero Venezuela a logra toch pa gana e wega finalmente. Awe, Aruba por tuma su revancha!. E seleccion di Aruba representando Caribe den e Little League World Series 2025 na Williamsport, Pennsylvania, ta topa e seleccion di Venezuela, representando Latino America awe diahuebs atardi pa 3’or den Stadion Lamade den e semifinal di e torneo. Tur dos tin un trayectoria interesante, ya cu pa cuminsa, ambos nan derota tabata contra e mesun ekipo, esta Taipei Chines. Aruba a perde contra nan dialuna cu score di 4-0, mientras cu Venezuela a perde contra Taipei, ayera merdia cu score di 7-3. Awor ambos ta haya un chens, y ta topa otro awe tardi. Y no tin cu lubida cu aña pasa, Venezuela a topa y elimina Aruba cu score di 2-1. Pues Aruba por tuma revancha contra Venezuela awe tardi. 

BOLBE TOPA TAIPEI

E interesante ta sigui, den sentido cu e ganador di e wega di awe, ta bolbe topa e seleccion di Taipei Chines, representando Asia, cual wega ta diasabra awor den e final internacional. Si Aruba gana awe, e ta sigui pa e wega di diasabra y si e gana diasabra, e ta bay contra e seleccion ganador representando Merca.