Aruba su haf ta den top 20 di mundo pa loke ta e industria turistico

MIAMI – Aruba su haf ta figura den e top 20 di mundo. Asina e portal turistico renombra Caribjournal ta raporta. Un estudio mundial nobo a revela e hafnan di crusero cu e bista di yegada mas impresionante — y tres destinacion den Caribe a gana un luga entre e top 20 di mundo.  

CON TA MIDI 

E investigacion, conduci pa AllClear Travel Insurance cu sede na Reino Uni, segun informe a usa tecnologia di eye-tracking pa midi cua bista di haf a capta atencion di e biaheronan prome y a tene esaki mas largo. Mientras cu destinacionnan Europeo a domina e ranking, e hafnan di Caribe a resulta igualmente inolvidabel pa pasaheronan crucero cu a yega.

ARUBA – CLASIFICA NA DI 6 LUGAR NA MUNDO

Net patras di Nassau ta e Terminal di Crucero di Aruba na Oranjestad, cu ta na di seis luga mundialmente cu un punctuacion di 79. “Barconan ta yega na un bista postcard di e fachadanan di colo di bonbiní di e capital di Caribe Hulandes, lamannan di aquamarin trankil y e costa yen di palma” e descripcion ta cuminsa bisa. “ For di e dek, pasaheronan por mira Eagle Beach den distancia y e palonan di divi-divi di e isla ta zwaai den e bientunan comercial” e descripcion ta finalisa bisando.

Nassau Cruise Port, e porta di entrada pa e kapital di Bahamas, tabata e entrada di Caribe cu mas halto, situa na di cinco luga mundialmente cu un puntuacion di 81 di 100. St Maarten ta na di 20 lugar na mundo. 

CON E RANKINGNAN A WORDO DETERMINA

E investigadonan di AllClear a evalua hafnan rond mundo, siguiendo con lihe y pa con largo e wowonan di e biaheronan a keda riba cada destinacion. E metodologia a destaca e impacto visual di yega cu barco — un momento cu hopi crucero ta bisa ta mes memorabel cu e tempo cu nan a pasa na tera. Mientras cu e haf di crucero di Valletta di Malta a encabesa e lista mundial.