Mike de Meza decepciona cu a corte a declara su apelacion no admisible

ORANJESTAD - Cu decepcion sr. de Meza y su team di defensa a tuma nota di e sentencia di Hof di awe 8 di augustus 2025. Asina abogado mr Desiree Croes a bisa diabierna atardi como reaccion riba e sentencia di algun ora prome. Manera cu Noticiacla a raporta algun ora prome, Hof a declara sr. de Meza no admisibel den su apelacion. Hof ta basa su desishon riba hurisprudencia di e Hoge Raad, di cual e defensa tabata y ta keda di opinion cu no ta aplicable na Aruba. “ Lamentablemente no tin caminda di bai Hoge Raad den e procedura aki. Mas bien e ta parce cu Hof a dicidi di tuma e 'easy way out'” e abogado a bisa.

CORTE EUROPEO

De Meza tabata e intencion di bai Corte Europeo di Derechonan Humano si e caso a sali negativo riba e contenido di e caso. Hof a evita esey cu e sentencia aki. Aunke Mike de Meza, hunto cu su team di defensa, no por ta di acuerdo cu e punto di bista di e Hof, mirando e tempo cu lo perde y no a trata e contenido di e caso, e caminda aki no lo wordo sigui aworaki. Segun Croes, Sr. de Meza y e team di defensa ta insisti den e argumentonan di riba cual Hof no a tuma un desicion y e team di defensa lo exigi un biaha mas di OM pa nan cambia nan postura incomprendibel i si ta nesesario lo bai corte, y si mester Hof bek. E momento ey, apesar cu tin otro opinion, lo sigui e caminda indica pa Hof, i si ta necesario despues si lo dirigi su mes na e Corte Europeo. Esey si Hof ta apoya Ministerio Publico den e violacionan continuo y grave di e derechonan di Sr. de Meza. Segun Croes, e  violacionan ta existi di nenga di notifica Sr. de Meza, manera art. 6 lid 3 di EVRM ta stipula, na un manera detaya di locual Sr. Meza ta ser sospecha, y tambe di viola su derecho riba un proceso hustu sin retraso innecesario y menos sin retraso intencional di e proceso penal, cu tur e consecuencianan esaki tin pa Sr. de Meza y tambe pa e interes general di Aruba. “E postura di Ministerio Publico di viola e derechonan di sr. de Meza riba un proceso husto na e manera grave aki, ta un biaha mas incomprendibel y tambe ta sigui alimenta e desconfiansa den MinisterioPublico cu ya ta biba den nos comunidad”, Croes a finalisa bisando.