Segun brokernan, tin necesidad pa e containernan wordo geclear mas rapido

ORANJESTAD -  “Hopi brokers a comparti nan preocupacion y a indica cu den nan concepto mester di mas personal pa por cumpli cu un demanda mas grandi, economia a crece, pero e cuerpo di Aduana no y tin un necesidad pa e containernan wordo geclear mas rapido. Esaki sigur ta un punto valido cu nos lo bai atende”, segun Minister Wever. E minister a subraya e rol fundamental di cooperacion entre Aduana y e brokernan durante e encuentro ‘Un rato cu Douane’, organisa pa Departamento di Aduana diaranson mainta.

TRANSPARENCIA

“E reunion di awe no ta solamente un cita riba e calendario,” Minister Wever a bisa. “E ta un refleho di nos compromiso pa fortalece e laso di colaboracion, mehora comunicacion y traha riba un sistema di importacion cu ta eficiente, transparente y prepara pa futuro.”

BRUG ENTRE  SECTOR PRIVA Y PUBLICO

Riba un isla manera Aruba, unda un gran mayoria di e productonan cu nos ta consumi ta wordo importa, un sistema logístico eficaz ta esencial pa bienestar di nos pueblo y pa sostene nos economia. Segun e minister, brokernan ta fungi como e brug vital entre sector priva y publico, asegurando cu regulacion ta sigui y proceso ta flui sin obstaculo.