KLM ta sufri perdida di 2 miyon euro, y Air France ta haci ganashi

AMSTERDAM – E aeroliña Air France-KLM ta hasiendo mihó. E compania di aviacion frances-hulandes a registra un ganashi mas halto den e ultimo seis lunanan cu un aña pasa. Sinembargo, su filial KLM ta sigui lucha.

Aunke e entrada di KLM a subi cu casi 6 porciento te na €6.3 biyon den e ultimo seis lunanan, toch e aerolinea Hulandes a sufri un perdida di €2 miyon. Esaki ta un mehoracion compara cu un aña pasa, ora KLM a registra un perdida di €31 miyon.

“Cosnan ta bayendo bon, pero no suficiente bon”, segun CEO di KLM, Marjan Rintel. “E avionnan ta yen, y ta einan e ta cuminsa. Nos por a desplega 3 porciento mas capacidad di avion, pero bo por mira nos gastonan interno y externo ta subi considerablemente. Esaki ta strobando nos di haci ganashi.”

AUMENTO DI GASTONAN DI SALARIO DEBI NA INFLACION

E gastonan di salario na KLM a aumenta durante e ultimo aña. Segun Rintel, esaki ta debi principalmente na inflacion persistente, cu Air France ta experenciando mucho menos di dje na Francia, e ta bisa. Tarifanan di aeropuerto na Schiphol tambe a subi drasticamente. “Nos tur mester recobra esey,” Rintel ta bisa.

KLM tambe ta wordo afecta pa e intrankilidad cu tin na mundo. Por ehempel, mester a desvia buelonan debi na e guera na Ucrania. Debi na e conflictonan den Medio Oriente, buelonan pa varios destinacion no ta completamente disponibel.