Apesar cu na Corsou belasting kantoor a sufri atake di ‘ransomware’, pago di belasting ta sigui!

WILLEMSTAD - Servisio di Impuesto Kòrsou ke enfatisá ku apesar ku e atake resien di ‘ransomware’ ta okashonando sierto limitashon den e servisionan ku ta ofresé, tur kontribuyente tin deber di kumpli na tempu ku loke nan mester paga. E sistemanan ku ta usa pa prosesá pago ta kompletamente operashonal i Ontvanger ta habrí den su orario di kustumber pa hasi areglo di pago.

Komo kontribuyente, por paga impuestonan ‘online’ na e maneranan di kustumber. Hasi pago personalmente ku karchi di banko na kaha, na Regentesselaan. Hasi un areglo di pago ku Ontvanger si no por paga mesora. Servisio di Impuesto ta hasi un yamada na tur siudadano pa hasi nan pago na tempu i asina evitá but i medida di kobransa.

E opshon di hasi areglo di pago ta un alivio pa esnan ku no ta den posishon pa paga mesora. Ontvanger ta pará kla pa atendé petishonnan pa un areglo.

Aunke ainda servisio na kliente no ta alkansabel en persona ni via telefòn, si tin pregunta tokante kon pa hasi deklarashon i kon pa usa e portal ‘online’, por manda esakinan via e formulario elektróniko ku tin riba e wèpsait, òf via ‘e-mail’.

Mientrastantu, Servisio di Impuesto ta sigui traha diligentemente pa pone su sistemanan bèk den servisio. Seguridat di e dato- i sistemanan ta keda e prioridat di mas haltu.

Mas informashon tokante pago, areglo di pago i orario di servisio ta disponibel via e kanalnan ofisial di Servisio di Impuesto Kòrsou. NOTA: Texto ta scirbi den papiamento fonetico di Corsou.