Acuerdo comercial entre Merca y Union Europeo ta ‘den alcanse’

BRUSELAS - Faltando un siman pa bai, Union Europeo y Merca ta parce cerca di cera un acuerdo comercial. Comision Europeo a yama un acuerdo “den alcance” ayera. E fecha limite impone pa presidente Trump riba e negoshadonan ta vence dia 1 di augustus proximo. Yega na un acuerdo ta keda e meta primordial, Presidente di Comision Europeo von der Leyen a reitera ayera. Minister di Comercio Mericano Lutnick tambe ta confia. “Nos ta bay pasa door di dje”, e la bisa na television Mericano diadomingo.

‘LEU FOR DI IDEAL’

E paisnan di UE a ricibi un actualisacion final riba e status di e negosiacionnan for di e comision diarason. A revela cu e negoshadonan ta bay den direccion di un tarifa di importacion di 15 porciento di Merca riba productonan Europeo exporta pa Merca. Un mayoria di paisnan di UE ta parce di ta comodo cu esaki. Den e caso ey, nan lo guli e derechonan di importacion di Merca sin cu UE tuma contramedida. Un oficial di UE: “Si tin excepcionan pa algun producto, e ta manehabel, aunke e ta keda leu di ta ideal.”