Na Corsou, prome di januari 2026 por pasa rijbewijs cu vehiculo automatico

WILLEMSTAD - Herbert Daantje instruktor di lès di outo de deklarashon na EXTRA siman pasá a mustra riba e kresementu den lèsnan ku outo outomátiko. Esaki ta spesialmente pa personanan ku nesesidat spesial i òf desabilitá. El a bisa den e entrevista ku tin hopi hende wardando riba e kambio den lei pa por saka reibeweis ku vehíkulo outomátiko. Parse ku vários minister a toka e tema akí pero te ainda esaki no a kristalisá. EXTRA a haña reakshon di minister Lew Jen Tai di BPD bou di kende e tema akí ta kai i el a duna e notisia ku pa promé di yanüari 2026 e kambio ta drenta na vigor.

Minister Lew Jen Tai a amplia riba e tópiko di e lei nobo kaminda ku pronto lo por saka reibeweis ku outo outomátiko. Entrante 1promé di yanüari 2026 lo ta e punto di salida, lo implementá e lei nobo akí definitivo. Ku esaki, minister Lew Je -Tai a afirmá ku e kambio ta un echo. E lei akí lo bai fasilitá e hóbennan ku ke saka reibeweis i tambe personanan ku tin sierto desabilidat. Gobièrnu di MFK ta keda pensa riba tur gremio den komunidat pa asina fasilitá e servisio pa ku e komunidat. Mas a leu minister Lew Jen Tai a duna di konosé ku ya tabatin vários reunion riba e punto aki, kaminda a sinta ku e instruktornan pa duna nan tur informashon nesesario. I tambe tin un reunion pendiente kaminda e instruktornan lo haña e oportunidat pa sinta ku minister na mesa i por hasié tur pregunta nesesario.

Minister Lew Jen Tai a siguí spliká EXTRA ku e idea no ta pa eliminá uso di vehíkulo standart sino mas bien pa agregá uso di vehíkulo outomátiko. Pues, e kliente lo tin e opshon pa skohe ku kua vehíkulo e lo ke praktiká pa di e forma akí saka su reibeweis. Teniendo esaki na kuenta, tur instruktor lo tin espasio pa por regla kompra di nan vehíkulo outomátiko pa di e forma akí brinda e servisio na komunidat. Nos kier a sa di minister "si a tene kuenta ku e grupo di personanan ku tin fecha den e lunanan benidero pa saka reibeweis pero ku awor lo bai kambia nan fecha pa otro aña na momentu ku e lei drenta na vigor. Kon lo dil ku esaki?" Minister a kontestá ku nan a pensa riba esaki i internamente ta pensando riba un plan kon lo bai atendé kuné.

Nan ta konsiente ku na momentu ku bini ku e fasilidat di saka reibeweis ku vehíkulo outomátiko, e demanda lo subi, mirando e fasilidat ku esaki ta trese kuné. Minister su kolaboradónan ta trahando riba e kapasidat humano pa por pasa tur e eksámennan ku outo outomátiko pa por haña nan reibeweis. NOTA: Texto ta scirbi den papiamento fonetico di Corsou.