SV La Fama ta inicia periodo di renobacion y reconstruccion di su infrastructura

ORANJESTAD - Awe mainta, esta 10 di juli 2025, SV La Fama a marca un paso sumamente importante y loke nan ta yama historico pa loke ta trata renobacion y reconstruccion di infrastructura di SV La Fama, cu ta den un estado critico y deplorabel. Directiva di SV La Fama for di comienso di nan periodo nobo a indica, cu nan tin plan grandi pa SV La Fama y specialmente e mucha- y hobennan di Savaneta cu ta encanta e deporte di futbol.

MANEHO Y VISION NOBO

Directiva a traha for di 2024 riba restructuracion interno y delinea hopi proceso y maneho cu segun nan, tabata completamente desalinea y sin vision pa futuro. Mester a paga hopi debe atrasa pa pone tur cos na ordo y tambe maneho interno tabata crucial pa enfoca riba dje. Ainda Directiva ta trahando pa sigui fortalece y structura esaki mas cu ta posibel, pa asina por garantisa un maneho efectivo, transparente y responsabel. 

Un di otro puntonan cu directiva a traha hopi duro tambe riba dje, tabata pa reconstrui y renoba henter e club di SV La Fama. E trabounan a inicia cu prome fase aki y ta premira pa termina pa fin di augustus 2025. Banda di renoba henter e club, directiva di SV La Fama tambe ta bay traha un propio gym pa e hungadornan por uza. 

COLABORACION Y CONTRIBUCION DI COMUNIDAD

Despues di a reuni cu varios stakeholders, directiva di SV La Fama por a inicia cu su proyecto di reconstrui e club mes, traha un gym como tambe traha un mini-turf riba parti di tereno di SV La Fama. Esaki sigur no tabata posibel sin e contribucion enorme di algun stakeholders, cu a compronde y sostene e vision di directiva di SV La Fama. Nan a percura pa coopera y contribui cu e bunita causa di reconstruccion y renobacion di SV La Fama pa nos mucha- y hobennan amante di futbol na Savaneta. 

Esaki ta un muestra cla, cu ora un directiva tin un vision y pasion pa haci algo y ta presenta su proyecto na un forma sostenibel y duradero pa bienestar general di un comunidad, cos grandi por sosode. 

Pa ora cu temporada nobo inicia, SV La Fama ta premira pa tin un gran parti di e club y mini-turf cla y asina ricibi tur su hungadornan, fanaticonan y henter comunidad y amante di futbol.