Eman: Partido awor lo busca un otro candidato pa bira e di shete minister

ORANJESTAD – Partido AVP a dicidi cu ta busca un otro candidato pa minister, envez di Mike de Meza. Asina prome minister Mike Eman a declara na e portal 24ora.com despues di su audiencia cu gobernador diamars merdia. Ken e persona ta bira, sinembargo ta keda un pregunta, ya cu e partido pues ainda no a dicidi. Den gang ta menciona nomber di Rene ‘Baba’ Herde pa reemplaza de Meza, pero e decision ey no a cay ‘ainda’. 

SPECULACION LO SIGUI 

Segun Eman, mientras cu no tin decision final ainda riba ken ta bira e proximo minister, lo tin speculacion riba ken ta haya e funcion ey. “Partido lo bay reuni internamente pa haci e miho evaluacion”, Eman a sigui bisa. E la admiti cu debi na e situacion cu colega Mike de Meza ta aden, esta cu e ta un sospechoso di husticia, e no por bira minister. 

MINISTER ‘MIENTRASTANTO’

Por lo menos, ta conoci awor cu sr de Meza lo no bira e minister number 7, sino un otro persona. Y si por a compronde sr Eman bon, e no ta cla ainda pa los di e posibilidad cu de Meza ainda lo por bira minister, unda cu e la usa e palabra ‘mientrastanto’ ora cu a splica e proceso. Pues cu lo tin cu busca un ‘otro persona mientrastanto’, enbez di djis bisa cu e ta busca un otro persona. Minister Eman a bisa cu nan ta realistico y esaki ta e situacion awor y como tal mester cana e caminda pa haci e esfuerso pa haci e team completo. 

SOSPECHOSO

Manera ta conoci cu siman pasa a haya confirmacion di Ministerio Publico cu Mike de Meza ta un sospechoso, pa cual e no por bira minister, conforme e ley di screening. E cargo ta relaciona cu su historia fiscal, y awor e tin cu bringa esaki den corte pa limpia su nomber, prome cu por pensa riba un funcion di minister.