OM: Ex-parlamentario di Corsou Calmes a falsifica 3 slip di salario di su colaboradonan

WILLEMSTAD - Ayera èks-parlamentario i lider polítiko di partido Trabou pa Kòrsou, Rennox Calmes, a presentá den korte sin abogado. E akusashon ku tin kontra di Calmes ta ku den periodo di 1e di mart 2022 te ku 28 di febrüari 2023 e so òf konhuntamente ku mas hende a falsifiká slep di salario di tres kolaboradó. E promé kolaboradó di inisial B. ku el a falsifiká su slep di salario ta for di mart 2022 te ku novèmber 2022. El a falsifiká kolaboradó B. su slep salario na 5 okashon; e di dos kolaboradó di inisial P. El a falsifiká su slep di salario na 3 okashon den luna di desèmber 2021 pa febrüari 2022. E último kolaboradó di inisial J.V., el a klasifiká su slep di salario na kuater okashon. El a falsifiká e salario bruto riba e slep di salario dje kolaboradónan. Na un okashon esaki tabata di 11.316, 34 florin, i despues a bisa 3670,17 florin, 5435 florin, 6624 florin i 9300,28 florin. E mester a manda e dokumentonan falsifiká sea via di meil òf app pa griffier di parlamentu. Na momentu ku un persona bira kolaboradó, e ta risibí 25% di su último salario. E suma aki ku su último salario, ta bira e total ku e ta gana komo kolaboradó di un frakshon den parlamentu.

Na momentu ku wes a puntra Calmes pa su adrès aktualmente, el a kontestá ku e no tin un adrès fiho awor akiípa biba. E no tin lugá pa biba. E ta wak kon e por komuniká ku korte, pasó e no tin adrès kaminda e ta biba.

Tambe Calmes a bisa wes ku e no ta sa ku su kaso lo keda tratá ayera. Ta den medionan di komunikashon, el a lesa ku e kaso ta ayera i p’esei a presentá pa wak kiko e kaso ta. E no sa nada dje akusashon den su kontra. Su presensia ayera tabata pidi wes pa wanta e kaso p’e buska un abogado. E tabatin abogado Sulvaran pa su defensa, pero esei no te kaso awor akí mas.

Fiskal a duna di konosé ku e kaso di ayera no ta pro-forma mas, pero mas bien un “reggie-zitting”. Fiskal a konsehá Calmes p’e buska un abogado, pasobra e kaso ta keda posponé pa 1e di sèptèmber. Riba e fecha akí ta trata e kaso kompleto i tambe lo pidi un kastigu p’é. Tambe fiskal a pidi pa skucha e kolaboradó J.V. ku ta partner di Calmes, komo testigu na wes komisario. Pasobra J.V. no kier a kontestá ningun pregunta na Landsrecherche. Fiskal a pidi pa skucha J.V. na wes komisario. Di akuerdo ku fiskal ainda J.V. ta sospechoso, pero e no a risibí un dagfar ainda di parti di ministerio públiko.

Wes finalmente a mustra Calmes ku e tin di buska un abogado pa defendé mas lihé posibel. Pasobra 1e di sèptèmber ta yega un bes. Ademas e ta bai di akuerdo pa skucha J.V. na wes komisario. Wes a posponé kaso pa 1e di sèptèmber 2025. NOTA: Texto ta scirbi den papiamento fonetico di Corsou.