Seleccion nacional di futbol di Corsou a keda elimina di Gold Cup

SAN JOSE - Ayera Selekshon di Kòrsou a topa ku Honduras, den un wega krusial pa disidí ken ta avansá pa kuart final di Gold Cup. Kòrsou a pèrdè lamentablemente ku skor di 2-1.

Kòrsou den promé mitar tabatin hopi pase malu den bolante, i tabata stroba desaroyo di e wega pa nan.

Na di 21 minüt mal notisia a bini pa Kòrsou, ora ku rèfri a dekretá un pinalti pa un infrakshon di Joshua Brenet.

Un ratu despues di a buska sosten visual di VAR, e rèfri Oshane Nation a kambia su desishon i kita e pinalti.

Sinembargo na di 32 minüt Jorge Alvarez ta skor un bon gol, pa asina manda Honduras ariba ku skor di 1-0. Esaki

despues ku el a haña nèt sufisiente espasio pa e por a tira.

Dies minüt despues Kòrsou a haña un regalo.

Ora ku na di 42 minüt riba un kruse for di un kòrner, e kiper di Honduras Edrick Menjivar ta desviá e bala den su mes gol.

E wega a sosegá asina empatá na unu.

Den di dos mitar Kòrsou un biaha mas no tabata tene e bala, i atrobe a pèrdè vários bala. Esaki ku un bolante ku no tabata brinda nada di kreatividat.

Honduras den e di dos mitar tabatin dos remate ku a dal den pal'i gol.

Na di 83 minüt tabatin un bon chèns pa Kòrsou. Esaki ora riba un bon kòrner, Roshon van Eijma ta kòp pero e kiper Menjivar ta tene e bala afó.

Na di 90 minüt Jürgen Locadia a haña un chèns, ora bala a bòns p'e den área penal.

Lamentablemente e delantero a manda e bala ariba i  no a skor.

Esaki tabata e último oportunidat pa Kòrsou den e partido.

Djis un ratu despues na di 90+1 minüt, Luis Palma a anotá pa duna Honduras e viktoria di 2-1.

Korsou ta finalisá na di tres lugá den Grupo B, i ta keda eliminá for di Gold Cup 2025. NOTA: Texto scirbi den papiamento fonetico di Corsou.