Analisis: Cos no ta pega rond di nombracion di un proximo minister

Skirbi pa Tito Laclé

E situacion politico rond di nombracion di un  minister (mas) pa gabinete AVP-FUTURO, no ta pega, manera cu hopi ta sea pretende, kere of argumenta. E situacion aworaki ta, cu minister presidente Mike Eman tin cu dicidi, si lo sigui cu e plan original di nombra shete (7) minister of no. Si e kier un di 7 minister, e lo mester postula un candidato na Gobernador cu por pasa e screening segun nos leynan. Pero, e por cambia e plan original y dicidi di keda cu 6 minister so manera cu e situacion ta aworaki. Osea - esey tambe ta un opcion realistico - pa no haci nada awor. Pues, tin differente opcion, y pesey no ta corecto pa bisa cu ‘cos ta pega’. 

OPCIONAN 

Mike Eman por cera wowo pa e realidad di resultado di screening, y postula Mike de Meza toch como minister na Gobernador. Nos por wak cu hasta tin presion riba Mike Eman pa haci esaki. Pero Gobernador no tin espacio pa acepta esaki, ya cu e nombracion lo ta den violacion di e ley di screening. Eman por postula un otro persona, cu no necesariamente mester tabata riba lista di AVP, y te hasta uno cu tin bendicion di Mike de Meza. Pero, e otro posibilidad ta, cu Eman por keda sin haci nada, cu ta nifica cu nos ta keda cu 6 minister. Legalmente, Arthur Dowers por keda cu e carteranan aki cu e tin aworaki, of hasta por reparti e cartera entre mas minister. Pero un gabinete cu 6 minister, lo no ta nada illegal. Constitucion di Aruba ta papia di un gabinete cu un minister presidente y demas ministernan, kiermen pa ley e minimo ta 3 minister. Pues no ta un obligacion pa Mike Eman nombra un otro persona. 

NADA TA PEGA

E pensamento cu ‘cos ta pega’, como tal, no ta berdad. No tin nada pega. Ta solamente cu Mike Eman no a cumpli cu ley pa laga Mike de Meza sa, cu e no a pasa screening. Pero, ta berdad tambe cu no tin castigo pa esey. Esta cu no por sanciona e prome minister pa no a cumpli cu e parti ey di e ley. 

KICO TA ROL DI GOBERNADOR?

Hopi ta grita den direccion cu ta Gobernador mester cay aden y forza Eman haci algo. Pero e realidad ta tambe cu Gobernador no por exigi un di 7 minister. Si Gobierno kier keda cu 6 minister, ta nan prerogativa. Pues contrario na pensamento cu ta core eyfo, no ta Gobernador ta ‘aan zet’, osea na turno pa actua. Si Mike Eman gewoon keda sin haci nada, cos ta gewoon sigui. Y esey kiermen e ora cu Arthur Dowers ta keda minister di energia, Mike de Meza ta keda pendiente di su caso, si OM dicidi cu ta persigui finalmente formalmente. Pero, tene na cuenta cu tin por lo menos dos caso su dilanti. Esta esun di Portulaca (ex minister Glenbert Croes) y Kwihi (ex minister Chris Romero). Pues por dura un poco, manera cu huez mes a bisa den Corte ora cu a trata e demanda contra DIMP.