Ayera den Gold Cup: Corsou a debuta cu empate contra El Salvador

SAN JOSE - Kos a start ayera pa Kòrsou den Gold Cup, ora ku nan a topa ku El Salvador den nan promé partido di e kompetensia. Den un wega ku Kòrsou a lusi mas mihó, e dos selekshonnan a parti punto den un empate na sero. Kòrsou a kuminsá ku mas mihó wega den e prome 15 minütnan di e partido, pero sin por a anotá gol. Leandro Bacuna tabatin un chèns den un huki difísil na di 13 minüt, pero e kiper Mario Gonzalez a trese salbashon.

Despues di e periodo den kua Kòrsou tabata e mihó ekipo riba tereno, El Salvador a haña chèns di drenta e wega.  Nan a krea peliger den parti final di e promé tempu, pero nan tampoko no a logra skor. Asina e promé tempu a finalisá ku e dos ekiponan empatá ainda na sero. Den di dos tempu Kòrsou a sali bèk manera nan a kuminsá e partido i tabata e mihó ekipo pa praktikamente hinter e di dos parti di e wega. Sinembargo selekshon di Kòrsou un biaha mas no por a konkretisá su oportunidatnan dilanti gol. Tantu Juriën Gaari i Gervane Kastaneer a faya oportunidatnan den e promé parti di e di dos tempu.

Jearl Margaritha ku a kousa basta problema pa El Salvador den di dos tempu, a kasi anotá ora un remate di dje a dal den pal’i gol na di 64 minüt. Despues na di 75 minüt, Jürgen Locadia ku a drenta di kambio, a pone un bunita bala pa Livano Comenencia, pero e hóben bolante no a kontrolá bon i su remate a pasa riba gol. Asina e dos ekiponan aki a empatá na sero, den e promé empate i alabes promé wega sin gol di Gold Cup 2025. Kòrsou su próksimo partido ta djasabra awor kontra Canada. NOTA: Texto ta scirbi den papiamento fonetico di Corsou.