Croes cu deadline pa O.M.: Bisa pakico de Meza ta sospechoso, sino ta hiba O.M. corte

ORANJESTAD – Candidato pa minister Mike de Meza ta duna Ministerio Publico te awe tardi 4pm pa publica di kico e ta un sospechoso. Si no haci esaki, e abogado mr Desiree Croes ta hiba Ministerio Publico corte via un caso sumario. Asina e abogado di de Meza a confirma pa Noticiacla diamars merdia. “Ta un derecho di cada persona cu ta wordo considera un sospechoso pa e sa di kico e ta wordo acusa”, Croes ta bisa Noticiacla. “Te awe Mike de Meza= no sa esey y e echo aki ta perhudica su defensa gravemente.  Lesa art. 6 EVRM” Croes a sigui bisa. 

DEADLINE 

Mirando cu ainda de Meza no sa pakico e ta sospechoso, abogado Croes e ora a bisa Noticiacla lo siguiente. “ Te awe 4pm OM por duna nos aangifte contra Mike de Meza, sino nos ta entama un strafrechtelijk KG pa haya sa di kico ta sospecha Mike de Meza”, abogado Croes a finalisa bisando.

OM TA KETO

Manera Noticiacla a raporta dialuna caba, riba nos pregunta kico ta e motibo di cu de Meza ta un sospechoso, e vocero a bisa cu e no ta nenga ni confirma cu de Meza ta un sospechoso di husticia. Nada mas lo a wordo bisa riba esaki.