Hefe local di interpol, Dolfi Richardson ta kibra silencio riba su caso

ORANJESTAD – Manera cu Noticiacla a raporta diaranson mainta, e actual hefe local di Interpol Dolfi Richardson a gana su caso contra gobierno di Aruba, referente un carta di buena conducta cu a wordo kita di dje. E la gana e caso aki, y awor a dicidi di acerca Noticiacla pa papia riba e caso aki. Noticiacla lo publica e declaracion integral di su declaracion den e caso aki.

“ Pa mas di trinta aña, mi a dedica mi mes cu lealtad i comromiso pa Aruba. Na e nivel mas halto den e sistema di hustisia, mi a sirbi—entre otro—como cabes di e departamento di investigashon di  Korps Politie Aruba, como chef di korps y awor den e capacidad di direktor di NCTVI. Tur e añanan, nunca no tabatin niun keho, niun medida disciplinario, niun mancha riba mi record profesional. Te e momentu aki. Te e investigashon aki. Te e procedimento aki, den cua e mes institucion cu mester ta garante di nos seguridad y nos derecho, a bira contra mi, cu metodo cu no ta pertenece den un estado di derecho democratico.

Mi confiansa den e institucionnan a sufri un daño profundo. I esei no ta dolo solamente como un oficial, pero como un ciudadano, como un ser humano. Como un hende cu semper a kere den e poder di lei, procedimento y gobernacion honesto. Pa un aña, mi a keda keyo, a soporta loke mester. Mi famia, mi coleganan, mi honor i mi nomber a wordo defende contra rumor y insinuacion. Pero awor e momento a yega pa papia. No pa resentimento, pero pa sentido di obligacion. No solamente pa mi mes, pero pa e oficio, pa tur hende ku por ta siguiente den e mes situacion, si nos laga e manera di actua sin consecuensia.

Loke a tuma lugar den e investigacion di seguridad aki no ta un malentendemento of un error administrativo, sino un desviacion serio di e sistema di derechonan. Un investigacion di seguridad mester ta basa riba cuido, obhetividad i legalidad—pero den e caso aki, e investigacion a wordo uza como instrumento pa destrui mi carakter; sin pruebannan, sin duna mi un oportunidad pa defende mi mes, sin consecuencia.

VDA, den su desicion pa kita mi Verklaring van Geen Bezwaar (VGB), a hasi acusacion serios, sin base i cu hopi daño personal. Nan a acusa mi di pone interes sexual riba e interes di servicio, di crea un ambiente di trabou inseguro i di daña e imágen di NCTVI—mi mes institucion cu mi a lidera cu integridad i dedicacion hopi aña. Esey no ta observacion neutral, sino insinuacionnan personal cu un falta total di base factual. No tin fayonan concreto, no tin verifikacion, no a duna mi un oportunidad di reacciona.  . Esei no ta un investigacion—esei ta un vendetta disfraza como seguridad di estado.

E acusacionnan aki a daña mi reputacion, un daño profundo i, masha probablemente, irremediabel. Nan tur tin característica di un campaña di calumnia: sugestivo, no controlabel i cla cu intencion pa destrui integridad personal i profesional.  Cu un departamento gubernamental por baha na e nivel—sin duna oportunidad pa defensa, sin echos, — ta un violacion cla i no aceptabel di e prinsipionan di bon gobernashon.

Den e procedimento aki, VDA no a comporta su mes como un entidad imparcial cu ta warda e orden democratico, sino como un parti den un conflicto, caminda interesnan institucional, resentimentunan personal i tensionan interno den NCTVI a combina den un cocktail peligroso. Nan a uza fuentenan anonimo sin garantia necesario, declaracion sin contexto i sin verificacion. Mescos e plazonan legal pa e investigacion no a wordo respeta. E prosedimento a tuma luga fuera di e periodo legal, cu ta pone e departamento fuera di e marco legal. E conclucion ta cla: e no ta solamente descuido legal—e ta abuso administrativo. Ademas, Comision di Supervision ya a confirma cu VDA ta keda na balor den su manehonan, i cu den otro investigacion tambe a wordo nota irregularidad. E caso aki ta confirma e observacion di manera doloroso, i ta expone e fayo sistematico di e institucion.

E situacion aki ta toca e fundacion mes di nos orden democratico. Si e manera di actua aki no ta wordo corigi, e ta crea un precedente. Precedente pa arbitrariedad. Pa poder sin control. Pa erosion di estado di derecho, disfraza como seguridad nacional. I esey no por tuma luga.

Loke ta riba mesa, ta mas grandi cu mi. Ta e pregunta si poder sin control, acusacion sin pruebannan, i actua sin verificacion por tin un lugar den nos sistema di derechonan. Si tin hende cu ta kere cu mi a comporta mi den un manera inapropia of reprehensibel pa nan, mi ta hasi un apelacion pa nan presenta un keho formal na e instancia cu ta autoriza pa esey, manera Landsrecherche of Korps Politie Aruba. Solamente den un marco legal, bou di direccion di un entidad independiente, por tin un investigacion transparente, controlabel i honesto, caminda e acusacionnan i mi defensa por wordo analiza cu cuido. Mi no tin miedo pa un investigacion. Al contrario. Mi temor ta e sentencia invisibel, e insinuacion sin control, e “baluacion” di un departamento cu ta abusa su poder sin niun control institucional.

Si mi accionnan verdaderamente ta motibo pa preocupacion, laga e institucionnan actua cu transparencia. Laga nan no keda opera tras di mascarada di secreto, insinuacion i moralismo. Laga berdad tuma su curso den un procedimento caminda tur partisipante—mi mes inclui—por conta riba e garantiannan cu un estado di derecho ta debe na su ciudadano”. Te aki e declaracion di Richardson riba su caso y situacion.