Gobierno di Hulanda ta tambaleando despues di reunion riba asilo

DEN HAAG - Lider di PVV Wilders ta malcontento cu e boluntad di e tres partidonan di coalicion hulandes pa papia tocante medidanan di asilo mas severo. Despues di un reunion di coalicion adicional, Wilders a bisa como contesta riba un pregunta si PVV lo bandona e coalicion “Cu e cos no ta parce bon”. E kier drumi un anochi mas riba dje, pero e ta papia di un “problema serio”.

E partidonan lo sigui papia mañan, probablemente alrededor di nuebe or ora di Hulanda.

Exactamente un siman pasa, Wilders a bin cu un plan di dies punto sin anuncia y a menasa di “bay” di otro manera. Diadomingo, el a duna su palabranan menasante mas peso ainda bisando riba X cu e lo bandona e coalicion si VVD, NSC, BBB no tin intencion di sostene e “mayoria” di su plan di dies punto.

P’esei e partidonan di coalicion mester a reuni awe nochi pa wak kico exactamente Wilders tabata kier men cu su palabranan.