Lugarnan di parkeer patras di Renaissance Marketplace a bira disponibel

ORANJESTAD – E dos lugarnan di parkeer patras di Renaissance Marketplace dialuna, parce a haya un ‘alivio’ di parkeer, unda cu por a nota mas espacio pa parkeer auto, compara cu normal. Y mas importante, pa uso di clientenan real di e Marketplace. Manera cu noticiacla a anuncia siman pasa, awe dialuna a inicia e periodo nobo unda cu e compania Wind Creek, propietario di Marketplace, a introduci pago awe dialuna pa uso di e dos espacionan di parkeer, si bo usa e tereno pa mas di tres ora. E intencion segun e gerente, tabata pa ‘free up’ lugarnan cu tabata wordo ‘perdi’ door di hende cu tabata usa e espacio pa parkeer pa henter dia, tur dia. E tabata crea falta di espacio pa clientenan cu kier a usa e facildadnan algun ora so,y no por a haya lugar di parkeer. Cu e cambio aki, a nota cu (mescos cu ora cu a introduci pago pa parkeer), e parkinglotnan a haya espacio atrobe, cu clientenan ‘real’ di e facilidad y area,  por a usa. 

NO TABATIN PROBLEMA

A compronde cu e dia a bay bon, y cu no tabatin mucho problema cu e introduccion. Critica tin semper, pero mescos cu tur cos, ora algo ta ‘nobo’, tin semper e resistencia inicial, pero cu na caminda ta mengua, te ora cu e bira e ‘normal nobo’. 

CRITICA

Notable (y comprendible) tabata e cantidad di comentario cu a bin cu e noticia anterior. Cu e lugar lo muri, pasobra hende no gusta paga pa parkeer, y asina tabatin un sin fin di comentario. Mayoria di nan, sin conocemento apropia di e situacion, y basa riba puro suposicion. E realidad ta cu, mescos cu tur otro caso, a introduce e sistema pa tin un miho control, y evita ‘abuso’ di parkeermento.