Entrante otro siman, Renaissance ta introduci cobransa pa parkeer, despues di 3 ora parkeer

ORANJESTAD  – Entrante dialuna otro siman 2 di juni, Wind Creek Aruba, doño di Renaissance Marketplace y e hotelnan, ta bay cuminsa cobra pa parkeer, si pasa 3 ora di parkeer. E hotel ta bisa cu e sistema ‘lo ofrece e nivel mas halto di servicio y accesibilidad mas fasil pa tur bisitante’. Ademas, ‘como partI di e compromiso pa sigui mehora e experiencia pa tur bishitante di nos resort, e sistema di parkeer lo duna acesibilidad di entrada y parkeer mas fluido, mientras ta sostene e demanda di atraccion y experiencia nan riba e propiedad’. Loke esaki ta nifica, basicamente, ta cu e sistema aki, por stop esnan cu ta malusa e lugar di parkeer priva, y laga nan auto henter dia eynan pa evita ‘parkeermeter’, blokeando e lugar pa otro personanan cu si kier bin disfruta di e sitio un rato. 

CON E SISTEMA TA FUNCIONA

Bishitante cu ta parkeer na banda di Renaissance Convention Center y na banda di Renaissance Ocean Suites lo disfruta di tres ora di parkeer gratis ora cu ta bishita nos restaurant, tienda, casino, Renaissance Convention Center, of cualkier otro outlet di Renaissance Wind Creek Aruba Resort. Cu e sistema nobo aki di parkeer tur bishitante lo disfruta di un entrada y parkeer garantiza na ambos parkeerplaats.

IMPORTANTE PA SA

Huesped cu lo kier drenta na e boom di parkeer na entrada di Renaissance Marketplace (na banda di restaurante Kalin’s) lo ricibi un ticket di parkeer. E prome 3 ora di parkeer ta gratis. Huesped cu lo sali PROME cu e 3 ora nan NO tin mester pasa paga na e kiosk di pago. E ticket di entrada lo ta bo ticket di salida!  Huesped cu ta keda (parkeer) mas cu 3 ora, lo paga cu e ticket cu a ricibi na entrada na e serf-service kiosk banda di e ATM, mei mei di Renaissance Marketplace prome cu bolbe na nan auto pa sali na e boom. Mester tin un ticket valido pa por sali di e parkeer plaats. Tarifa ta cuminsa na AWG 12 pa 3–4 ora, cu un AWG 3 pa ora adicional y un maximo diario di AWG 30. Por paga solamente cu debit/credit card. No ta acepta cash. “Nos ta implementa esaki pa segura cu tur huesped—si acaso ta pasa pa un kofie rapido, bo lunch of un cena parti atardi, of cualkier evento —por ricibi un experiencia di parkeer eficiente y sigur,” asina Sr. Paul Gielen, General Manager a menciona. “Esaki ta un paso mas den nos desaroyo pa sigui sirbi nos comunidat local y global cu pasion y calidad.”