Awe ta 20 aña pasa cu Aruba a experencia ‘desaparicion’ di Natalee Holloway

ORANJESTAD – Awe ta 20 aña pasa cu Aruba a hay’e den un situacion horibel, cu a pone rapidamente riba mapa mundial den un forma negativo. E studiante mericano Natalee e tempo ey, a tabata na Aruba durante un bishita di graduacion di su scol secundario, ora cu e la disparce riba 30 di mei 2005. A sospecha e hoben local Joran vd Sloot como e persona supuestamente responsabel pa e desaparicion ya cu e tabata e ultimo cu a mira Holloway.  E caso a bira internacional rapidamente, ora cu prensa internacional, primordialmente di Merca, a invadi Aruba y cuminsa raporta riba e caso, mandando señalnan rond mundo. Hunto cu e famia di Natalee Holloway, a lastra Aruba su nomber, a cataloga autoridad policial como 'padvinders', y unda cu Aruba mester a soporta un sin fin di insulto. Na final, Vd Sloot a confesa cu e tabata responsabel pa e morto di Holloway, i ta sintando su castigo di prizon pa un otro caso di asesinato na Peru. 

PUBLICIDAD NEGATIVO

Pa un periodo largo, Aruba a sufri di e atencion negativo, cu a afecta turismo for di e mercado principal, esta Merca. Autoridad di turismo y gobierno mester a traha duro pa contraaresta ponencianan negativo, y crea un campana proaactivo positivo pa asina drecha e imagen atacha. E mama di Natalee, considerando cu Aruba no a haci suficiente pa recupera su yiu, a hacie su mission pa destrui Aruba y papia malo di nos isla, na cada occasion cu e por a haya. E la dedica resto di su bida pa papia publicamente riba desaparicion di su yiu, con pa combati esaki, y den cada presentacion, papia malo di Aruba. 

ARUBA A BONS BEK

Aruba a logra bons bek si, y logra kita e mancha negativo for di dje, cu tempo y aworaki e ta solamente un memoria malo, cu a keda atras. Esey no ta kita afo, cu constantemente e caso ta bin bek rato rato, sigur den medionan Mericano, pa cual a traha te hasta varios pelicula, serie y buki riba e tema.