Aruba a registra su di dos morto di trafico pa aña 2025

ORANJESTAD - Diahuebs pa 6:15 di atardi central di polis a wordo notifica di un accidente na unda un auto a alcansa un peaton na altura di Watergate na De La Sallestraat. 

A despacha polis di biaha na e sitio di e sucedido como tambe ambulance.  Na yega di polis a bin topa cu un homber di edad avansa ariba caminda na unda su situacion tabata mustra grave. 

Personal di ambulance a presenta na e sitio na unda a trata e victima y stabilise. Cu maximo urgencia ela wordo transporta pa hospital.  Specialista di trafico ta presenta na e sitio pa haci na investigacion. 

Departamento di slachtofferhulp a wordo poni na altura asina por asisti e famia na nan yegada na hospital.  Lamentablemente un rato pasa pa 10:22 di anochi dokter a constata morto di Eliseo Berrospi Upayacu naci na Peru 14 juni 1939 ( tabatin 85 aña di edad). Esaki ta bira e di dos morto den trafico pa aña 2025. 

Cuerpo Policial ta manda palabra di condolencia na famia die fayecido.