Besaril:” Mi no a kere cu mi lo a caba mi carera asina”

ORANJESTAD – E hecho cu ex minister plenipotenciario Guilfred Besaril a termina dilanti mesa berde, e mes ta haya hopi malo.”Mi no a kere cu mi lo a caba cu mi carera asina. Esey a tocami duro” e ex minister y polis a bisa huez diamars ora cu a puntre pa su situacion personal. Manera ta e echo den tur caso penal, huez ta puntra e sospechoso pa su situacion actual, pa e por tene cuenta cu ne ora di aplica un sentencia. 

DIFICIL

Segun Besaril, prome cu esey, durante tratamento di e caso, a sigura cu si tabatin un regla mas cla di con pa usa e debit card di gobierno, e lo a use asina. Pero no tabatin’e. Despues di cada cos, ta facil pa wak bek y papia. Pero segun Besaril, e semper a actua di e miho forma. ‘Nunca mi a transferi un debchi di placa di gobierno, pa mi cuenta personal. Nunca!” e ex mininister a sigura. E la mustra cu su fe ferviente den Dios, tine para ainda. “Mi tin un rijschool (lugar pa siña hende core auto pa haya rijbewijs), pero e ta hopi dificil. Ken kier haya les di un hende cu tabata cera den prizon?”, Besaril a sigui bisa. “Mi ta para dilanti bo, cu Dios. Esaki ta mi berdad!. Mi ta lo mas honesto posibel. Y esey ta dunami paz” e ex minister a sigui bisa. “Bo ta haya un stempel! Bida ta dificil na cas. E bida a cambia hopi drastico”. 

DICTADOR

Loke e la haya hopi erg, ta pa lesa awor despues, con (algun) trahadonan tabata papia di dje, como si fuera e tabata un dictador, indicando cu tabata dificil pa traha cu ne, cu tabatin hopi tension na trabou etc. “E ta dificil pa tende esey. Y tur esey siendo cu mi tabatin un opendoor policy”, Besaril a sigui bisa. Danki Dios su casa tin un bon trabou, y e ta na cas, tumando tur e otro responsabilidad riba dje, pa asina por lo menos e por sinti cu e ta contribui, enbez di sinta un banda y keha. Diabierna mainta, fiscal ta presenta su rekisitorio, den cual e lo exigi e respectivo castigo, pa despues e abogadonan di Ling y Besaril presenta nan defensa.