Huez: Besaril tabata usa debitcard mucho facil y Ling no a para e actuacion!

Posted on 05/20/2025 6:02 pm AST | Updated on 05/20/2025 8:11 pm AST

ORANJESTAD – Malversacion di fondo di pais Aruba, uso excesivo di fondo di pueblo (ta papia di casi 200 mil florin) y abuso di poder ta loke cu e ex minister plenipotenciario Guilfred Besaril a keda confronta cu ne diamars mainta den corte door di huez, cu e comienso di e caso penal Tulipan. Mes momento e huez a cuestiona e capacidad di sr G.Ling, e otro sospechoso, pa loke ta su capacitad como director interino di e tempo ey di Arubahuis na Hulanda entre 2018 y 2022 pa para e gastamento di placa excesivo. Loke e caso a ilustra, pues ta un periodo unda cu un persona (e ex minister) a haci y deshaci cu fondo di gobierno, sea inocentemente of no, y no a tene su mes na reglanan cu nan mes a stipula na inicio di su periodo como minister. Y pa loke ta e director interno, su incapacidad di actua responsablemente y eherce su funcion pa cual e la keda apunta pa haci Awe diamars, tabata e prome di dos dia cu Corte a reserva pa tratamento di e caso aki. Un caso cu por a sinti e frustracion hopi biaha cerca Besaril, durante e intercambio di informacion entre e y e fiscal, y tambe algun biaha, cu e huez. Besaril a sigura sinembargo na final di e prome dia di tratamento, cu e no tabata tenso, sino cu ora cu hende papia cos robez, e tabata coregi e situacion.

E CASO

Tur e iregularidadnan a bin na cla despues cu un carta ‘anonimo’ dirigi na prome minister Evelyn Wever e tempo ey a bira conoci. Wever Croes a haya ta suficiente pa entrega un denuncia den e caso aki, contra su propio minister y director interino di Arubahuis, Guilfred Besaril y G. Ling. A resulta cu cos tabata malo basta tempo, for di 2010, segun un rapport di Centraal Accountants Dienst (CAD:red), pero cu ningun hende a actua ariba. Ironicamente, Ling diamars a anuncia cu ora cu e la bin na 2018, a nota loke tabata pasa y a mustra di no a conpronde con no a haci nada pa 8 aña largo despues di e rapport.

INTEROGACION DI HUEZ

Huez a cuminsa cu e caso, cuestionando e respectivo actuacion di e dos sospechosonan durante e periodo cu nan tabata den funcion. Basando su mes riba e resultado di investigacion cu a haci despues di e denuncia, e la confronta ambos sospechoso directamente diamars mainta. Sigur, ora cu Ling a referi na e problemanan cu tabatin, y cu den consulta cu Besaril, a traha un memo dirigi na trahadornan di Arubahuis, cu cos mester cambia, y a duna reglanan ‘nobo’ di con cos mester cana awor. SInembargo, por a nota cu nada no a cambia despues. Ora cu Ling a bisa huez cu ‘nada no a cambia’, huez a puntre directamente “ Unda bo responsabilidad a keda?”. “Mi tabata den un posicion cu mi autoridad tabata wordo mina”, Ling a contesta. “Si un persona no tabata haya su gana, nan tabata bay cerca e minister cu tabata ‘overrule’ mi”, Ling a bisa, culpando Besaril, sinta apenas un meter mas lew di dje den corte. E expression di Besaril den corte tabata suficiente pa mira cu e no por a kere su mes con Ling tabata declara contra dje. E interogacion ey a medio set e tono di e resto di e dia, esta Ling, tirando tur culpa riba Besaril, y Besaril, sea nengando e acusacion of no cordando kico a sosode.

DOSSIER

Huez a reparti henter e dia den ‘dossiers’, for di gastonan telefonico haci, pa reconstruccion di cas, vacantie na Aruba, uso di e debitcard di gobierno, propiedad di huur, muebles, cas, malversacion di fondonan priva, tarheta di debito di Arubahuis, y abuso di funcion. Y finalmente e caso di expropiacion di 200.000 euro for di Besaril.

AUTOMATISMO PA USA DEBITCARD DI GOBIERNO

Loke a resalta segun e huez, ta cu Besaril no tabata sa maneha e tarheta (debitcard) cu fondo di gobierno, y tabata usa esaki ‘mucho facil’. “Tabatin un automatismo cu cual bo tabata usa e carchi” huez a tilda Besaril. ‘Pakico bo no a actua otro, declara e placa cu intencion pa despues cobr’e bek?”. Huez ta mustra cu un pa dos, Besaril tabata cla pa swipe cu e carchi, sea na Hulanda of/ y na Aruba. Consecuencia ta cu e la gasta miles di placa, fondo di pais Aruba, di cual e la purba di paga un parti bek caba. Fiscal a bay mas leu y a bisa Besaril:"Bo no tabata tene bo mes na e reglanan. Tabatin regla, nan (bo trahadonan) tabata alertabo y tahabo, y toch bo tabata gasta (placa) cu no tabata permiti".

TELEFON

E prome parti tabata e uso di telefon, cuenta telefonico y internet. Huez a cuestion’e pa a habri un cuenta di Setar na Aruba na cas di su tata, pa uso personal, pero lagando Aruba paga esaki. Besaril a defende su curpa, argumentando cu e desicionan tuma, tabata pa scapa placa, primordialmente di roaming. Y cu e la habri e cuenta na cas di su tata, tabata pasobra e no por a hacie na su cas debi cu tabata ‘renoba’ esaki. E la sigura cu semper e la usa e telefon pa trabou. Huez a cuestiona cu den 5 aña e la gasta 15 mil na telefon. Incluyendo 1500 euro cu e mester a paga pa dos dia di roaming. Ni maske con Besaril a purba splica huez y fiscal, e ultimonan aki tabata sigui confront’e cu mas asunto telefonico. Algun di nan, Besaril a bisa di no tabata corda pakico e la haci tal, y otronan, ta cu ta SETAR su pakete no tabata ofrece otro cu e mester a tuma un cuenta asina ki. Tabatin un reclamo di huez cu ta bisa cu a facture uso di telefon na cas di su tata, mientras cu e no tabata ni na Aruba. Y asina tabatin mas cos cu e huez a cuestiona Besaril. “Asina cu mi cas tabata cla, e situacion a cambia” Besaril a purba convence huez. Un otro reclamo di huez den direccion di Besaril, ta dicon e tabata keda na hotel siendo cu e tin cas na Aruba, (di su tata). Aki, Besaril a bisa cu e cas di su tata ta chikito, y como tal a opta pa keda na hotel.

PAKICO LING NO A INTERVENI

Despues ta Ling a haya di huez. Huez a cuestiona Ling, pakico e tabata permiti cosnan di pasa, y no a stop esaki. Segun Ling, e la bisa Besaril cu cierto gastonan tabata priva y no por a haci nan y laga Aruba paga. Pero Besaril, segun Ling, tabata sigure cu e tabata bezig cu ministerraad pa regla un ke otro. Ademas e lo a ricibi un ‘aprobacion’ di prome minister di e tempo ey, Evelyn Wever-Croes. Solamente cu e aprobacion nunca a bin. Por lo menos, segun Ling, e no a wak esaki. “Tabata warda riba aprobacion di financien, pero e no tabata bin y nos mester a sigui” Ling a sigui bisa.

NAÏVE

Huez a cuestiona e actitud di Ling, pa a laga e cos bay asina. ‘Pakico a warda asina hopi pa papia cu e minister?”. “Mi tabata naïve” Ling a bisa, y ta admiti cu e mester a actua diferente y ta haya su mes responsabel pa esaki. “Pero, ABO ta director. Bo tabatin un responsabilidad toch?”, e huez a sigui puntra. “Mi tabata den un posicion vulnerable!”, Ling a sigui bisa. “KIco tabata e posicion vulnerable”, e huez tabata kier a sa. “E tabata e hefe. Mi no tabata sigur kico mi posicion tabata”, Ling a contesta. Aki huez a mira y constata un cos.”Boso ta blo culpa otro. Con un organisacion por ta integro, si ningun hende asumi responsabilidad” e huez a sigui bisa, un poco irita.

RESIDENCIA OFICIAL

Un tema cu tambe a haya hopi atencion, ta esun di e residencia oficial. Besaril tabatin derecho pa uza e residencia oficial como minister plenipotenciario, cu tabata propiedad di pais Aruba na Hulanda. Besaril a opta pa no keda den e residencia oficial, debi cu e tabata e ubica dilanti di un centro di rehabilitacion di adicto y e no tabata kier ta eynan cu su famia. E ta e mesun cas den cual un otro ministernan plenipotenciario si a biba aden (tambe cu famia cu yiunan me or di edad). Huez a referi na un di e ex-minister plenipotenciario aki tambe, indicando tambe cu den su tempo, apenas e la uza e debitcard di gobierno, y si e la uz’e mes, e tabata laga un declaracion extensivo atras. Esaki e la haci pa ilustra e diferencia cu Besaril su actuacion. Bek pa e cas, Besaril a sigura cu e la muda un caminda, cu aprobacion di gobierno di Aruba. Pero e no a djis huur e cas, sino tambe a dicidi pa haci un renobacion di e residencia ey, cu rapidamente a coste mas di 20 mil euro, cu tambe Aruba a paga, sin palabracion cu e doño lo compensa pa esaki despues. Ora cu fiscal a puntr’e pakico e no a haci manera tur hende ta haci, esta ta un calculacion di gasto y despues actua. Segun Besaril, e la asumi cu cos lo a bay bon, y e no tin experiencia cu construccion. E ta sigura huez cu e mes a spanta ora cu e suma a yega asina halto. “Mesora mi a frena e situacion!” Besaril a bisa. “Tabatin 6 pagina di informacion riba e renobacion!” huez a cuestiona Besaril. “Nunca mi lo a haci’e si mi tabata sa cu e lo a bay costa asina hopi!” Besaril a bisa huez, cu tabata sigui cuestiona e ex mandatario. Loke cu no a bay bon pa e huez, ta e hecho cu aunke cu Besaril a sigura cu tabatin un acuerdo di parti di e prome minister, niun caminda por a haya e acuerdo aki, riba papel. ‘E tabata un acuerdo verbal” Besaril a purba convence huez.

RECLAMO ATROBE NA LING

Y un biaha mas, huez a reclama Ling pa su falta di actuacion. “Kico bo firma ta bal, si e ta solamente algo technico administrativo. Pakico bo tabata firma (e recibonan) si bo no tabata di acuerdo!. Bo no tabata controla (e trabou!)?”. “Mi tabata fada!”, Ling a bisa, indicando un biaha mas cu e no tabata aproba e actuacion di Besaril. Ora cu huez a puntra Ling, pakico e tabata fada, Ling a sigui ‘basha abou’. “Cosnan tabata pasa sin mi aprobacion. Y tabata sosode depsues. Mi no por a haci nada. Mi tabata vulnerable”. Y finalmente e punto mas interesante:” Mi no tabata permiti pa comunica cu prome minister. Mi no ta un politico. Nan tabata haci loke nan tabata kier. Mi tabatey pa pret (spek en bonen:red).

MAS PROBLEMA

Huez a cuestiona Besaril y Ling tambe riba nan uso di fondo, ora di compra di muebles pa Besaril, compra di alarma pa e cas, remodelacion di e jardin, uso di trahado riba contract na Aruba, y mas. Diabierna mainta, fiscal ta presenta su rekisitorio, den cual e lo exigi e respectivo castigo, pa despues e abogadonan di Ling y Besaril presenta nan defensa.

A prolonga detencion di chauffeur di accidente fatal cu a laga dos peaton morto
ORANJESTAD – Detencion di e dama chauffeur cu a causa e accidente fatal di diadomingo lagando dos persona morto, a keda prolonga cu 2 siman. Huez comisario a haya necesario pa e prolongacion y asina ta duna ministerio publico razon cu ta esun cu a pidi pa prolonga esaki tambe.
Mas Corte
Lesa Mas
Diahuebs hues comisario ta dicidi si ta prolonga detencion di e chauffeur cu a causa morto di dos peaton
ORANJESTAD – E dama chauffeur cu a causa e accidente fatal lagando dos peaton morto, C. Fernandes (24), ainda deteni, lo presenta dilanti huez comisario diahuebs awor. Aki e huez comisario lo dicidi si ta prolonga e detencion si of no. Vocero di Ministerio Publico Ann Angela a confirma diamars atardi, cu lo pidi pa prolonga e detencion di e dama aki. “Finalmente ta na huez comisario pa dicidi si ta prolonga su detencion of no” e la bisa noticiacla.
Mas Corte
Lesa Mas
Modernisacion di derecho penal y proceso penal na Caribe ta bay desigual
WILLEMSTAD/ ORANJESTAD – E modernisacion di e derecho penal y proceso penal den e parti Caribe di Reino ta progresando, pero no ta bay mescos na tur paisnan. Aruba ya a introduci e Wetboek di Proceso Penal renoba, Corsou a acepta e ley pero ta pospone su introduccion, mientras cu e trayecto di legislacion na Sint-Maarten ta practicamente para. Esaki ta resulta for di e cronica Derecho Caribe, cu a wordo publica e siman aki den Nederlands Juristenblad. Segun e autornan, desde e disolucion di Antias Hulandes, a wordo traha riba codigonan separa, pero cu contenido lo mas posible mescos, pa Aruba, Corsou, Sint-Maarten y Caribe Hulandes. E meta ta uniformidad den derecho penal y proceso penal, entre otro pasobra di e practica huridico comparti den Reino. Pero te ainda e uniformidad ey no a wordo logra.
Mas Corte
Lesa Mas
Corte Superior a sentencia asesino di Sayuri Petronia na 6 aña di prizon
ORANJESTAD - Corte Superior di Husticia a dicta sentencia contra e sospechoso I.M.P. den e caso penal Last Call. E procedimento a trata unicamente e parti di castigo. I. Principaal a wordo condena na 2023 pa homicidio di un mucha muher di 19 aña, cometi riba 4 di juni 2021. Na 2024, Hoge Raad a anula e decision aki di Corte Superior, pero solamente pa loke ta e parti di castigo. Esey a nifica cu Corte Superior mester a dicidi di nobo tocante e castigo y e medida cu lo wordo impone riba e sospechoso.
Mas Corte
Lesa Mas
Nelson ‘Speed’ Andrade ta unico periodista ainda persigui den caso di radio di polis otro aña
ORANJESTAD – Dialuna atardi, Ministerio Publico a anuncia cu nan a entrega e citacion na un di e 4 periodistanan envolvi den e caso conoci como New York, cu ta trata e asunto di radio di polis y unda cu un polis a keda cera, pa motibo di lo a yuda e grupo di periodista tin aceso na informacion ‘confidencial’ di polis. Despues cu e caso a tuma lugar e aña aki, a resulta cu 4 di e 5 periodistanan cu a keda condena, a dicidi di acepta nan condena, ta haci nan sentencia irrevocable. Solamente un periodista, conocido Nelson “Speed” Andrade, so no a toca esey. Den su caso, tanto Ministerio Publico como Andrade a apela su sentencia. E la haya e sentencia mas pisa di tur, esta haya un castigo di prison di 18 luna, di cual 12 ta condicional, y un tempo di prueba di 3 aña. A compronde cu dos di nan, Koolman y Giel, OM lo a yega na acuerdo pa ambos retira nan apelacion.
Mas Corte
Lesa Mas
Ministerio Publico di Aruba a introduci areglo di keho pa ciudadano
ORANJESTAD - Ministerio Publico a introduci recientemente un areglo di keho (klachtenregeling) pa ciudadano. E areglo di keho ta inclui tambe un formulario di keho (klachtenformulier). Di awor pa dilanti ciudadanonan tin e posibilidad pa, na un manera relativamente facil y sin mucho obstaculo, entrega un keho. Por haya tanto e formulario como e areglo di keho riba website di Ministerio Publico: www.omaruba.com.
Mas Corte
Lesa Mas