Fundacion Muchila Creativo y Colegio Muchila Creativo ta celebra Dia Internacional di Museo diadomingo

ORANJESTAD  – Fundacion Muchila Creativo y Colegio Muchila Creativo ta invita pueblo di Aruba pa un celebracion di Dia Internacional di Museo diadomingo 18 di Mei 2025. E evento lo tuma lugar di 10:00 a.m. te cu 3:00 p.m. na Violet Center for the Arts, situa den Caya G.F. Betico Croes 83, banda di ex Burger King.

Un di e “highlights” mas grandi di e celebracion aki ta e inauguracion di un exposicion special, caminda e studiantenan di Colegio Muchila Creativo lo presenta nan obranan di e profiel Art & Design. E exposicion aki ta duna publico un chens pa admira e talento artistico di nos studiante y experencia con arte por sirbi como un instrumento poderoso pa inclusion y innovacion.

Banda di e exposicion, e invitadonan por disfruta di un programa inspira y varia cu arte como guia principal. Lo tin tayer di teatro, musica y arte visual, y nos studiantenan lo presenta un baile y un ensemble di percusion pa entretene e publico.

Ademas, nos cafetaria lo bende snacks, aroz con pollo, bebida y sopi, asina por haya un experiencia cultural y artistico completo.

Fundacion Muchila Creativo y Colegio Muchila Creativo ta invita tur hende pa pasa serca nos y experencia, participa, crea y expresa cu arte y cultura. No perde e oportunidad pa forma parti di un evento significante y yen di inspiracion.

Pa mas informacion, por tuma contacto na Tel: 5838921 of manda un mensahe na 5691716.