Caso di Mike de Meza contra DIMP ta fin di mei awor!

ORANJESTAD – E caso cu parlamentario Mike de Meza a entama contra Departamento di Impuesto, ta tuma lugar fin di luna, pa ta exacto 28 di mei 2025 pa 11:30am. Abogado mr Desiree Croes a confirma e fecha aki pa Noticiacla dialuna atardi. E intencion ta pa huez tuma un decision den e caso aki unda cu de Meza ta insisti cu e tin razon y cu ta DIMP ta strob’e di bira minister mientras cu di otro banda, DIMP ta para ariba cu nan tin razon y cu segun nan informacion, no por otorga de Meza e loke cu e ta pidi pe, esta un gedrags verklaring positivo fiscal.  Manera cu Noticiacla a anticipa y informa anteriormente, parlamentario y candidato pa minister Mike de Meza ta bay bringa departamento di impuesto (DIMP) dilanti mesa berde. Diahuebs atardi noticiaacla a haya confirmacion cu diabierna mainta, e abogado ta entrega e apelacion (bezwaar) y voorlopige voorziening na nomber di su cliente. “Ta laga e decision den man di huez” e abogado ta sigui bisa.

INTENTO PA KEDA CLA CU DIMP

Segun e abogado a bisa e portal aki ultimo biaha, ‘apesar di splica directora di DIMP na placa chiquito cu cliente Mike de Meza tin derecho di haya un verklaring omtrent het fiscale gedrag, mirando cu no tin ningun debe di impuesto, no a logra convence di esaki’. Y esey ta e motibo cu ta bay corte cu DIMP. E problema di DIMP ta e motibo aworaki cu de Meza no por keda cla pa bira minister pa gabinete AVP-FUTURO, debi cu esaki tabata e ‘struikelblok’ den e proceso di screening di e candidato pa minister.