Na Corsou, Gobernador a huramenta Parlamento nobo

WILLEMSTAD.- Na okashon di huramentashon di parlamentarionan nobo, gobernadó sra. Lucille George-Wout a hiba palabra na e 21 parlamentarionan, kaminda a pidi nan pa salbaguardiá nos estado di derecho demokrátiko. Na e elekshon dia 21 di mart, pueblo di Kòrsou a papia palabra kla. Komo miembronan di Staten, nan ta asumí nan funshon den tempu kompliká i turbulento. Nos isla ta fuertemente konektá ku e mundu rònt di nos. I susesonan internashonal ta di gran impakto riba nos seguridat, i tambe riba relashonnan sosial. Skohe pa sirbi interes i bienestar públiko, den un époka manera esaki, lokual ku kada un di bosnan ta hasi, ta demostrá kurashí i un sentido di responsabilidat enorme. E desishon aki meresé tur hende su respèt i apresio.

Asuntunan eksistente lo eksigí nan atenshon. Pero para firme, asta ora karga bira pisá i kosnan bira difísil, lo ta un reto grandi. No opstante esaki, gobernadó a hasi un apelashon na kada un dje 21 miembronan di parlamentu, na nòmber di pueblo di Kòrsou, pa salbaguardiá nos estado di derecho demokrátiko, i no pèrdè e interes general for di bista. Tantu interes di e mayoria i sigur interes di e minoria.

Pa medio di huramentu òf promesa, e parlamentarionan a kaba di deklará lealtat na Rei, i na nos Statüt. A hura òf primintí pa yuda sostené konstitushon di Kòrsou i pa defendé bienestar di nos isla lo mehor posibel. Pa logra esaki, palabra mester bira akshon tambe. Esaki ta un responsabilidat i tarea kolektivo pa traha huntu na desaroyo di nos pais den Reino, i na benefisio di tur siudadanonan. Kòrsou ta ansioso pa sera konosí ku su parlamentu nobo, ku desde ayera lo sirbi komo órgano di kontròl pa e gabinete demishonario ainda, i den futuro serkano lo kumpli ku e funshon akí pa e gabinete nobo. Sperando alabes ku nan lo ehersé e tarea akí komo ko-legislado i di ehersé nan derecho di presupuesto debidamente, esta, e asina yama ‘budgetrecht’ di parlamentu.

Un parlamentu ku lo garantisá ku órganonan di konseho gubernamental manera SER, Raad van Advies, Ombudsman i Kontrolaria General, ta bon posishoná. Hasi uso di nan kapasidat i stimulá nan pa nan duna nan aporte kaminda ta nesesario. “Ta pa bosnan nan ta traha”. Ayera tur e órganonan aki a forma parti di huramentashon di e parlamentarionan nobo. Huntu ta garantisá e sistema ‘checks and balances’. Kada un ku su propio tarea i responsabilidatnan, ku ta esensial pa funshonamentu di nos estado di derecho demokrátiko. “Ami tambe”, lo sigui vigilá i kontribuí na esaki. Di e manera akí den nos komunidat e konfiansa mutuo, den gobièrnu i den futuro di nos isla, lo sigui krese.

“Nos tur ta kompartí e mesun mishon. Nos ta sirbidó di pueblo di Kòrsou. Aki na Kòrsou, den Reino i mas ayá tambe. Trabou di parlamentario ta honorabel i di gran responsabilidat i hopi eksigente”, gobernadó sra. Lucille George-Wout a terminá deseando e parlamentarionan sabiduria den nan trabou. NOTA: Texto ta scirbi den Papiamento fonetico di Corsou.