Universidad di Aruba ta celebra e promocion di Dr. Clementia Eugene

ORANJESTAD -   Universidad di Aruba  a anuncia e logro di  Dr. Clementia Eugene, docente di e programa Social Work & Development, di su doktorado.   

Dia 30 di april 2025, Clemenia Eugene a haya su PhD riba e topico ‘Reimamgining Child Maltreatment: A Human Development Capability Approach’ (Reimaginando Maltrato di Mucha): Un Acercamento di Capacidad di Desaroyo Humano). El a defende su tesis exitosamente durante un sesion publico den Centrumkerk, e aula oficial di Anton de Kom Universiteit na Surinam (AdeKUS). 

E estudio aki ta enfoca riba abuso di mucha na Aruba y ta analisa e prevalencia y implicacionnan pa e desaroyo humano di mucha. E investigacion ta basa riba un acercamento di derecho y e ‘Human Development Capability Approach’ desaroya pa Amartya Sen en Martha Nussbaum. E investigacion ta destaca con abuso ta influencia desaroyo di mucha door di haci uzo di e cuadra di Nussbaums di dies habilidad, cu ta pone enfasis riba dignidad, calidad di bida y husticia. 

Pa loke ta su metodologia e estudio ta consisti di dos encuesta cuantitativo: un encuesta di scol di aña 2019 bou di 895 mucha di 12-17 aña y un encuesta di 2021 bou di 98 profesional for di diferente sector (salubridad, husticia, educacion y departamentonan social) pa husga e efectividad di e ‘Child Safety Code’ (e Codigo di Siguridad di Mucha). E resultadonan ta mustra un prevalencia di 78.4 %, cu ta encera mas tanto abuso fisico y menos abuso sexual dentro di famia. For di e resultadonan ta resalta cu 68.1 % di e muchanan ta cay bou di e categoria ‘cantidad abou di polivictima’, locual ta nifica cu nan ta experiencia no mas di dos te tres sorto di abuso. Ademas muchanan di famia di un solo mayor ta cay cu mas frecuencia den e categoria di ‘catidad halto di polivictima’, mientras muchanan cu ta biba cu ambos mayor ta cu mas frecuencia ‘polivictima di cantidad abou’.