Secrets Baby Beach ta ricibi su prome huesped den juni pero ta pospone apertura inaugural pa november

ORANJESTAD – MIentras cu e hotel Secrets Baby Beach ta cla pa ricibi su prome huespednan dia 5 di juni proximo, a dicidi cu ta hala e apertura official pa November di e aña aki. E intencion tabata pa tene e ceremonia official dia 30 di mei proximo. Pero a opta pa cambia esaki ya cu e apertura official lo a nifica un pausa den preparacion official. Y esey nan ta prefera di no haci, y ta prefera pa priorisa un apertura suave y sin interupcion. A compronde cu ora cu e hotel habri su porta dia 5 di juni proximo , e lo ainda falta algun parti, pero pa November, e lo ta operando cu su capacidad completo.  

E HOTEL 

E hotel di 304 ta un estilo all-inclusive, y tin por lo menos 3 pool, y no menos cu 6 restaurant. Manera cu e nomber mes ta bisa, e ta all-inclusive pues e turista cu ta bishita e hotel aki, ta haya tur cos inclui, esta hospedahe, alimento y bebida. E ta e di 3 hotel mas nobo cu ta habri su portanan den e ultimo aña y ta pertence na e cadena hotelero Hyatt.