Politiconan nobo haciendo politica bieu

Scirbi pa Tito Laclé

Politica riba un isla chikito manera Aruba ta keda fascinante. Y mi no kier men e den e forma mas positivo. Aruba ‘porfin’ tin un gobierno nobo, aunke no completo, pero nos tin un gobierno cu ta sinta pa algo mas cu un luna awor. Y mientras cu bo por bisa cu nan ta sinta un tempo cortico, ya caba ta bisto cu e forma di traha, no a cambia. Den e situacion actual, nos conoce un mixto di politiconan bieu y nobo, pero den realidad, no tin mucho diferencia. Por lo menos no den e forma di haci politica. Y apesar cu e nobonan a priminti bo un ‘politica renoba’, it’s still old politics. E payasonan a cambia, pero e circo ta mescos, manera e dicho ta bisa. Tur siman, e partidonan politico cu tin asiento den Parlamento (y hasta tin biaha esnan cu no tin asiento!)  ta tene nan conferencia di prensa, unda cu cada politico di e respetivo partido ta haya un turno pa papia, unda e ta presenta su ‘tema’ di siman. Un tema cu E a scohe, cu no necesariamente ta e tema alcaso. Y no mester menciona mes e cantidad di potret cu cada minister y parlamentario ta saca na cada actividad cu nan atende. Asina nan ta keda ‘in the picture’. 

PLAY DURO

Ta ‘pret’ pa wak con di un banda, un parlamentario cu p.e. ta sostene e coalicion, ta ‘exigi’ splicacion di su propio gobierno of propio colega di partido, y den mesun rosea, ta alaba su logronan, minando asina e seriedad di su mesun pregunta. Bo por bisa, ‘si, pero e politico mester por ta critico contra su propio gobierno, toch?’. Si, pero nos tur sa cu en realidad, no ta asina e politico ta inspira confiansa: door di ataca su mesun gobierno. Y vooral e nobatonan lo siña hopi liher, cu esun cu mas ta obstaculisa su propio partido cu un comportacion critico, por sinti e consecuencia na e proximo eleccion, ora di trahamento di lista. P’esey, lastimamente, e politiconan nobo, no lo por cambia esaki, y consecuentemente lo sigui e mesun formato di semper. Ta djis e cara a cambia. Prensa ta wordo bombardea tur dia cu yen di comunicado di e politiconan. Y si, nan tur ta wordo publica berdad, no pasobra nan ta importante y informativo, sino e ta un bon forma di ‘yena corant’. Osea ta fungi como ‘bladvullers’. Mi sa esey di mi experiencia di antes, ora cu mi tabata traha na corant. Y sigur riba un isla unda cu fuera di politica y accidente di trafico, no tin mucho ta pasa. Y tin casi un operacion sin coordinacion unda cu bo por haya varios politico di e mesun partido, tocando e mesun tema.

OVERKILL CU TEMA

E simannan aki, e temanan tabata e.o. e logro di cambia e lista positivo di remedi, y e aumento di pensioen. Los di ken a logra kico, e politiconan ta yena corant y website cu articulonan elogiando e ‘logro’ di nan respectivo partido y e evento of actividad cu nan a bishita. Si mi no tin hera, mi a lesa articulo di por lo menos 3 politico di e mesun partido, riba e mesun tema. Pa no papia mes di e propaganda riba rednan social, primordialmente Facebook, y e potretnan di unda nan a bay. Ni “dodenherdenking” cu ta algo solemne no ta scapa nan batayon di fotografonan y coordinador di PR. E diferencia ta awor, cu e biaha aki ta toca partidonan berde y biña cla, pa yena rednan social y paginan di corant y website, cu articulo di mesun tema. Gobierno anterior tabata mescos. Aunke cu e tabata un poco diferente si. Ora cu tin un logro, cada minister y parlamentario tabata usa e mesun texto, y tabata simplemente share e riba nan pagina. Ta manera cu nan ta sinta den un reunion interno y ta planea con pa bombardia pueblo ‘strategicamente’ cu e mesun mensahe.  Mester tin un miho manera pa usa media, pa trece mensahenan of temanan cu ta mas diverso, of no? Y no 12 (mi ta exagera awor si un poco) articulo di logro di aumento di pensioen of adaptacion di lista di remedi positivo.  

100 DIA

Mientrastanto nos falta algo mas cu 2 luna pa nos yega e prome 100 dia di e gabinete aki. Cu 39 dia trahando, loke a logra ta, pa cumpli cu un  promesa mitar mitar, ehecuta un promesa cu e gabinete anterior tabata trahando ariba pero no a keda cla cu ne, y cuminsa kita hendenan cu gobierno anterior a nombra, pa pone nan mesun hendenan. Ora cu e 100 dianan yega, cu ta na comienso di juli di e aña aki, mi ta spera cu tin cierto resultado concreto, y un cambio di politica, vooral di e nobatonan. Menos bla bla, menos elogio pa e partidonan, y mas accion y cambio positivo. Menos fotos di bishita aki aya, y mas logro concreto. Mi ta keda positivo.