Mike de Meza ta entama caso sumario contra DIMP

ORANJESTAD – Mike de Meza ta hiba Departamento di Impuesto (DIMP) corte. Esaki a keda confirma diabierna pa e abogado na Noticiacla. No ta conoci ki dia e caso ta tuma lugar pero, ta keda pendiente pa esaki. E motibo ta cu no ta contento con e desaroyo cu DIMP a cana y como tal ta opta pa bay corte pa haya claridad. Dialuna ultimo e deadline final a vence, unda cu tabata kier a haya mas claridad di DIMP, den forma di un carta cu ta splica e comportacion fiscal di de Meza. Pero mirando cu partidonan no ta hayando otro toch, a opta awor pa bay corte. 

E PROME DEADLINE

Mester bisa cu esaki ta e di dos deadline cu DIMP a haye confronta cune, ya cu e prome deadline poni pa de Meza su abogado, tabata pa 17 di April ultimo. Aki DIMP a contesta de Meza, y noticiacla a compronde cu e contesta ey tabata uno negativo pa de Meza. E deadline, tabata pasobra e prome biaha cu a pidi DIMP pa info, e info a bin, pero cu segun e abogado, e informacion no tabata Cuadra. “E no ta klop”, e abogado a bisa e portal aki e tempo ey. Basa riba esey, a exigi un carta mas specifico y a pone un ultimatum. DIMP a cumpli cu e demanda ey pero no a cambia di pensamento y a manda un reaccion negativo.