Iberostar Beachfront Resorts a presenta su Shoco Boulevard

Posted on 04/29/2025 10:46 am AST | Updated on 04/29/2025 4:09 pm AST

ORANJESTAD – JOIA Aruba by Iberostar dialuna a anuncia su sosten na e plan visionario "Plan Nacional Conservacion di Shoco di Aruba Birdlife Conservation" (ABC) cu e inauguracion di Shoco Boulevard. Shoco Boulevard ta un coredor pa bida silvestre, crea pa proteha e simbolo nacional stima di Aruba, e Shoco (Athene Cunicularia Arubensis). Como parti di e logro aki, Iberostar a firma oficialmente e acuerdo di "Shoco Community Conservation" cu ABC, reforzando e compromiso pa proteha e Shoco y sostene e esfuerso nacional di conservacion. E iniciativa aki ta un contribucion directo na e liderato di ABC pa conserva y asina subraya e compromiso di Iberostar pa duna sosten na esfuerso local, invertiendo den biodiversidad nacional y na mes momento respetando experticio local. Shoco Boulevard di JOIA Aruba cuidadosamente a construi buraconan artificial (neishi di Shoco) memey di flora nativo manera cawara, pal'i sia, wayaca, kibrahacha, fofoti, aloe, cadushi y bushi. Ya cu shoco ta evita areanan denso unda tin palonan halto y matanan ornamental, e escogencia pa uza matanan nativo ta garantisa cu e shoconan tin un espacio sigur y natural unda nan por biba trankil y prospera. E coredor aki ta diseña y dedica exclusivamente pa e shoconan. Aki nan tin un espacio proteha pa biba, reproduci y move liber sin wordo molestia. Tur hende por observa e shoconan, respetuosamente for di un distancia, loke ta permiti e magnifico parhanan aki florece den un entorno natural. Na mes momento, esaki ta promove aprecio y conscientisacion pa e biodiversidad unico di Aruba. E iniciativa aki hamas por a keda realisa sin e cuadro di conservacion importante di Aruba Birdlife Conservation (ABC) y Iberostar ta sinti su mes honra pa ofrece su aporte, recurso y espacio pa dicho causa. E proyecto aki ta un extension di e Shoco Sanctuary establici na Tierra del Sol Golf Course pa Iberostar na december 2024, unda e prome neishi articifial a keda introduci ya caba na 2019. Desde december 2024, e initiativa a crece cu un total di 32 buraco artificial (20% di e populacion di Shoco). E Shoco Boulevard awor ta representa e segundo fase di e plan ABC, pa desaroya un Comunidad di Shoco extenso pa medio di coredornan natural pa facilita e shoconan traha neishi y move tur rond nos isla. Demostrando e compromiso di Iberostar pa cu iniciativanan local y manteniendo estrictamente na e recomendacionnan di ABC, e proyecto Shoco Boulevard por a realisa conservacion di e instalacionnan di JOIA Aruba. Asina a crea un habitat sigur pa e poblacion di shoco y brindando tanto na turista y local un experencia rico, interactuando cu nan entorno natural. E proposito di e espacionan aki ta pa ofrece areanan mas safe pa e shoconan por broei y apoya metanan mas amplio di biodiversidad, yudando preserva e ecosistema unico di Aruba y garantisa un entorno natural cu ta keda pa futuro generacionnan. Den curason di e proyecto aki tin un storia special: Shon Shoco Pirata, un shoco resistente cu a haci JOIA Aruba by Iberostar, su hogar. Na 2022, auto a dal Shon Shoco Pirata cerca di su neishi na rand di caminda. Despues di casi un aña di rehabilitacion na man di un veterinario dedica, el a triunfa y bolbe bek na su zona preferi. Inspira pa su perseverancia, e team di JOIA, bou direccion di ABC, a haya un luga mas safe p'e y pa futuro generacionnan di Shoco. Asina a nace e Shoco Boulevard, un coredor den cual nan por traha nan neishi di forma safe y cu tur comodidad di e poblacion di Shoco. Awe, por reconoce Shon Shoco Pirata facilmente, pa su unico wowo cu e tin, simbolisando resistencia y speransa pa e esfuersonan di conservacion di e bida silvestre na Aruba. Dentro di e movimento global di sostenibilidad di Iberostar, e iniciativa "Wave of Change", ta refleha e creencia central di Iberostar cu e impacto real ta wordo produci pa medio di mehoracion di e experiencia local, respet pa naturalesa y socionan confiabel. Shoco Boulevard a keda oficialmente presenta durante un evento emotivo riba diadomingo 27 di april 2025, unda lidernan gubernamental, incluso minister di Finansa y Asuntonan Economico, Geoffrey Wever, ministro di Husticia, Integracion y Transporte Publico, Arthur Dowers, y miembro di Parlamento y Presidente di comision di Turismo, Jennifer J. Arends-Reyes— a reuni pa celebra y reconoce e importancia di proteha e tesoronan natural di Aruba. Durante e evento, e ministronan a cera conocí tambe cu Aula di Lama, e centro educativo nobo di JOIA Aruba, diseña pa inspira y educa mucha, ONG y scolnan riba e biodiversidad rico di nos isla mediante experencia interactivo. Aula di Lama, un aula educativo di e Ola di Cambio, ta un espacio multifuncional y participativo disponibel pa scolnan local y ONG, dedica pa studia y explora temanan relaciona cu sostenibilidad na Aruba. E localidad inovador aki ta ofrece un oportunidad unico pa participa den actividadnan di investigacion y educacion dirigi riba e importancia di ecosistemanan terestre, marino y di costa. Apoyando e Plan Nacional di Conservacion di e Shoco di ABC, Iberostar tin como obhetivo pa amplia esfuersonan di ABC pa crea concientisacion pa e necesidad pa proteha e especienan aki. Pa medio di dicho apoyo, Iberostar ta invita tambe otro entidadnan den e industria turistico di Aruba, pa cuminsa cu iniciativanan similar, fomentando e creacion di e coredornan di conservacion adicional rond e isla y reforsa asina un movecion colectivo pa un futuro mas sostenibel pa e ambiente natural y unico di Aruba. Tocante Iberostar Hotel & Resorts: "Iberostar Hotels & Resorts" ta e division di hotel cu ta forma e negoshi principal di Grupo Iberostar, un multinacional di Spaña, 100% familiar cu casi 70 aña di historia den sector turistico, cu origen empresarial cu ta bay te 1877. Su portfolio ta inclui 31.500 camber den 100 hotel di cuatro y cinco strea den 13 pais, dedica na ofrece un calidad excepcional y un servicio sincero. Na mes momento nan ta defende e modelo di turismo responsabel cu tin como prioridad, bienestar tanto di e hende como di naturalesa. Cu 2,5 miyon bishitante pa aña y un presencia privilegia den prome liña di beach, e marca Iberostar Beachfront Resorts ta ofrece tres segmento distinto pa cumpli cu e soño di vacacion di cada turista. Iberostar Waves ta ofrece experencianan yen di diversion, perfecto pa famia y pareha, amante di lama. Iberostar Selection ta ofrece estadianan premium, espacioso y relahante cu un servicio excepcional. Por ultimo, JOIA by Iberostar ta un coleccion di resort di luho na lugarnan exclusivo, cu ta distingui nan mes pa un servicio altamente personalisa y sofestica.

AWSS: Medio mei por sinti e efecto nan positivo di e cambio na Bubali su planta
ORANJESTAD – Aruba Wastewater Sustainable Solutions (AWSS) dialuna, a informa cu desde medio mei lo por cuminsa experencia e efecto nan positivo di e cambio nan ehecuta na Bubali su planta, caminda e planta lo ta den un bon condicion pa procesa e awa sushi cu e ta ricibi den un forma adecuadamente. AWSS a splica cu su meta pa e proximo luna nan ta pa improvisa e cualidad di e awa procesa na e nivel cu ta conforme e norma nan.
Mas Local
Lesa Mas
Wind Creek Aruba ta presenta e di 7 edicion di Long Table Aruba
ORANJESTAD – E di 7 edicion di Long Table Aruba, organisa pa Wind Creek Aruba, ta back pa un solo anochi, e unico mesa di cena di mas largo completamente blanco cu un balor di $60,000 pa Aruba. E evento di e anja aki lo tuma lugar diadomingo, 22 di Juni y lo conta cu un setup di un mesa largo di 1000 pia cu lo wordo prepara pa 1000 invitado bisti na blanco riba L.G Smith’s Boulevard dilanti Renaissance Wind Creek Aruba Resort. Tickets di entrada lo ta $60, lo por reserva esaki online diaranson 14 di Mei, pa exactamente 10:00 or di mainta!
Mas Local
Lesa Mas
Pastoor Maduro: Sorprendi cu nombramento di e Papa nobo, pero contento tambe
ORANJESTAD – “Pa ami esaki tawata un sorpresa grandi y Spirito Santo no tawata cu vakantie ora e Cardenalnan a vota“, tabata e prome reaccion di pastoor Jairo Maduro di parokia di Santa Cruz na NoticiaCla diabierna, riba e nombramento di e Papa nobo Leon XIV un dia prome. “ Ayera tawata un dia di hubilo pa mundo henter y Iglesia Catolico Romano, ora cua keda scohi un Papa Nobo den persona di Robert Francis Prevost Martinez cu a tuma e nomber di LEON XIV”.
Mas Local
Lesa Mas
JET-TNCA FBO Aruba a uni na Air Elite by World Fuel Network
ORANJESTAD - JET-TNCA FBO Aruba (JET-TNCA), opera pa Aruba Airport Authority N.V. (AAA), a anuncia cu oficialmente, for di aña pasa, Aruba a wordu reconoci como e FBO number 86 den e organisacion Air Elite by World Fuel Network. E logro aki ta e resultado di un proceso riguroso di dos aña, cu a inicia durante e NBAA Schedulers and Dispatchers Conference, caminda a invita JET-TNCA pa prome biaha como un posibel miembro. For di e tempo ey, e team di JET-TNCA a traha estrechamente cu e representantenan di World Fuel, Air Elite y otro miembronan, pa asina mantene un comunicacion directo y keda alinea cu e normanan di e red.
Mas Local
Lesa Mas
WEB: Tanki nobo di awa na Alto Vista ta garantisa suministro di awa stabil
ORANJESTAD – WEB Aruba N.V. diabierna a informa cu den cuadro di e proyecto pa construccion y instalacion di un tanki di awa pa Alto Vista, e siman aki a marca e centro di e tanki pa asina e preparacionnan final pa e instalacion di e vloer di staal por tuma luga. Na luna di november di aña 2022 a cuminsa cu e trabaonan di desmantelacion di e tanki di awa bieu. Fin di 2024 y comienso di 2025 a evalua solucionnan mas duradero pa e vloer, sea di concrete of di staal y finalmente a escoge pa un vloer di staal. E proyecto aki ta forma parti di “Upgrade Aruba Water Distribution Network” cu ta un proyecto mas grandi y integral cu ta encera construccion, instalacion di tanki nobo, cambio di pomp y tuberianan tur rond di nos isla. Pa WEB e inversion den un tanki nobo pa Alto Vista ta uno strategico y esencial.
Mas Local
Lesa Mas
SETAR empoderando educacion: tur scol na Aruba awo conecta riba Fiber!
(ADVERTORIAL)
Mas Local
Lesa Mas