- AWSS: Medio mei por sinti e efecto nan positivo di e cambio na Bubali su planta
- Caso di Mike de Meza contra DIMP ta fin di mei awor!
- Na Corsou, Gobernador a huramenta Parlamento nobo
- Premier Schoof impresiona cu empresario Kock na Aruba
- Eman: Autosuficiencia y resiliencia Arubano a sobresali durante bishita di premier Dick Schoof
Gabinete AVP-FUTURO a pidi Szabó reconsidera decision pa aumenta tasa di interes
ORANJESTAD – Gabinete AVP-FUTURO a pidi secretario di estado hulandes Szabó pa reconsidera su decision pa aumenta e tasa di interes pa e pago di debe di Covid. Specificamente ta sugeri pa aplasa e tempo cu 6 siman, den cual partidonan lo mester keda cla pa entrega e concepto di e rijkswet nobo pa supervision financiero.
Den un carta, fecha 28 di April 2025, nan ta splica e caso pakico no ta bay logra cumpli cu e deadline di 1 di mei proximo (diahuebs awor).
Entre nan, e hecho cu Fondo Monetario Internacional no a presenta e conseho riba cual nan tabata warda, na tempo. E tardansa di ricibi e conseho, a trece tardansa tambe den e proceso pa haya conseho di e respectivo organonan local y Hulandes manera Rva y Raad van State. “Bou di e condicionan aki, mester ta cla cu ta imposibel cu por logra cumpli cu e fecha di 1 di mei , y cu awor Aruba ta wordo castiga pa algo cu no ta su falta”, e carta ta sigui bisa.
STATUS DI NEGOSACION
E status di negosacion ta hopi avansa segun e gabinete ta sigui bisa den su carta, y a bisa cu (manera indica anteriormente pa minister Geoffrey Wever), entrega por lo menos tur informacion cu tin aworaki riba e tema, prome cu 1 mei 2025, por lo menos riba tereno di ambtenaar, pa tin algo entrega.
AUMENTO DI INTERES NO TA RAZONABEL
Loke ta interesante, ta cu e gabinete ta splica Szabó cu e aumento di e interes lo tin consecuencias serio pa Aruba. Esaki pasobra ‘e aumento, e aumento di 6.9% ta te hasta mas halto cu e tasa cu Aruba ta paga riba e mercado local y internacional na interes’. Ademas e aumento di e tasa, ta nifica cu Aruba tin cu paga 10 miyon mas na interes den 2025. Y durante e bishita recien di minister Wever na Washington, a bin sali na cla cu e hecho cu Aruba no tin acuerdo ainda cu Hulanda, y e aumento di e tasa di interes, por tin efecto negativo riba e tasa di interes cu Aruba por haya di institutonan financiero ora di busca fiansa den exterior pa refinancia debenan cu ta madura e aña aki.
PROLONGA E TEMPO CU 6 SIMAN
MIrando tur esaki, e gabinete a pidi Szabó pa prolonga e tempo cu 6 siman mas. “Riba e proceso cu ta sigui, Aruba tin poco influencia’ e carta ta sigui bisa. Ademas, Aruba no tin influencia riba e proceso di conseho cu tin cu cana na Hulanda y como tal, dificilmente por tene Aruba responsabel pa esaki. A base di tur e ariba menciona, e gabinete a pidi Szabó pa un prolongacion. Por lesa e carta AKI.
Eman: Autosuficiencia y resiliencia Arubano a sobresali durante bishita di premier Dick Schoof
ORANJESTAD - Diasabra atardi, Prome Minister di Aruba, mr. Mike Eman, a ricibi cu honor su homologo Hulandes, Prome Minister Dick Schoof, na su oficina na Cocolishi pa un reunion formal y strategico. Durante e reunion cu henter conseho di minister a dialoga riba e lasonan politico y di cooperacion entre Aruba y Hulanda.
Bishita di Schoof na hospital: Pashentnan indocumenta ta peso enorme riba fondo di HOH
ORANJESTAD - Como parti di e bishita di trabao di Prome Minister di Hulanda Dick Schoof diadomingo mainta, Minister di Salud Publico Drs. Mervin Wyatt-Ras, a compaña Premier Schoof den un bishita na Hospital Horacio Oduber (HOH). Jacco Vroegop, Director di HOH, hunto cu miembronan di directiva di hospital, a ricibi Premier Schoof y Minister Wyatt-Ras y a invita e delegacion pa un reunion cu demas miembronan di directiva. Durante di e reunion, a intercambia punto di bista riba e futuro di HOH, e importancia di inverti den capacitacion continuo di personal medico y di enfermeria, y e nesesidad pa reserva puestonan pa nos studiantenan local por specialisa na Hulanda pa por garantisa cuido medico di calidad y moderno pa nos comunidad y bishitantenan. Ademas a intercambia pensamento riba un cooperacion strategico cu Hulanda pa locual ta trata e compra di remedi hunto, pa por haya esaki na prijs mas economico.
No ta converti e debe di Covid, den un fondo di inversion
ORANJESTAD – Hulanda no ta pro pa converti e debe di Covid, den un fondo di inversion. Un fondo di inversion ta bon pa Aruba, pero no cu placa di Hulanda. Esaki tabata e comentario di e prome minister hulandes Dick Schoof durante su prome encuentro cu prensa diasabra na Aruba. Cu esaki, e ta confirma e pensamento di secretario di estad Zsolt Szabó, cu a bisa Noticiacla recientemente mescos tambe. Fondo di inversion ta un bon idea, pero cu fondo local. No manera cu e prome minister di Aruba mr Mike Eman a sugeri, y propaga durante e campaña electoral, esta cu mester converti e debe di Covid, den un fondo di inversion. Schoof a para ariba cu Aruba tin cu cumpli cu e palabracion haci, esta cu tin cu paga e debe bek. Pues no por cambia esaki den un fondo di inversion.
Bista fotografico di e prome dia di bishita di premier hulandes Schoof
ORANJESTAD - Diasabra e prome minister di Hulanda Dick Schoof durante su prome bishita na Aruba, e mandatario tabata basta ocupa. E la bishita Fort Zoutman, Cocolishi y Gobernador di Aruba. Un bista fotografico di su prome dia di bishita.
Prome Minister di Hulanda Dick Schoof ta na Aruba
ORANJESTAD - Prome Minister hulandes Dick Schoof a yega Aruba diasabra merdia pa un bishita di 22 ora. Prome Minister mr. Mike Eman a ricibi e mandatariona Aeropuerto Reina Beatrix acompaña pa altocomisario di Polis, drs. Ramon Arnhem y director interino di VNO, Vincent Storimans.
Prome minister di Hulanda Dick Schoof ta bishita Aruba e weekend aki
ORANJESTAD - Promé minister hulandes Dick Schoof ta bishita Aruba e fin di siman aki, pa ta exacto 22 ora, cuminsando diasabra 10 di mei. E bishita di cera conoci ta caracterisa pa Reino den un mundo cu ta cambiando. Banda di encuentronan cu gobernador-, prome minister y miembronan di Staten di Aruba, e bishita ta encera un programa diverso. Riba 10 di mei e ta biahe pa Aruba. Aki e ta bishita un empresa local y e ta bishita Hospital Horacio Oduber y Korrektie Instituut Aruba (KIA). E promé minister ta sali 11 di mei pa Corsou, unda e ta haña un rekorido na e base di marina.
Follow NoticiaCla
