MEP a pidi Gerlien Croes pa stop di colga na saya di Evelyn Wever-Croes

ORANJESTAD – Como reaccion riba e critica di actual minister Gerlien Croes na ex premier Wever-Croes cu su videonan bunita pero cu e ta esun responsabel pa e tardansa den e proceso di RAFt nobo, e partido a sali na defensa di su lider Wever Croes y a pidi sra Croes pa no colga na su saya. Di un banda, e partido ta considera cu e ta un honor cu srabGerlien Croes kier colga na saya di sra Wever-Croes pasobra cu e legado cu e ta laga atras ta grandi. Y sra Gerlien Croes basicamente ta confirma esaki segun e partido geel.

CANSA

Aki e partido a bay riba e echo cu contrario na sra Croes, cu algun tempo atras a cancela algun actividad ‘pasobra e tabata cansa’, cu sra Wever-Croes si nunca ta cansa. “Evelyn Wever Croes ta un lider cu nunca ta cansa, cu hasta ora tur ta drumi, e ta sigui labora” e partido a sigui bisa.  “ Cu e mesun energia incansabel aki nos Lider Evelyn Wever Croes a negocia cu Hulanda na interes di Aruba y nos Pueblo. Ora cu tur otro a grita: “firma pa caba loke cu Hulanda a exigi”,  Evelyn Wever Croes a pone pia abou cu e si lo no ta esun cu lo pone su firma bou un documento cu lo malogra e futuro di Aruba” e partido a sigui bisa.  

LAGA TUR COS CLA

E partido ta sigura cu Gabinete Wever Croes II a laga tur cos cla atras pa e Gobierno nobo. “Pero pa nan propio incompetencia, awo Gerlien kier sconde bou saya di Evelyn en bes di asumi su responsabilidad como vice prome Minister y e minister encarga cu relacionnan den Reino. Kier tira culpa riba Evelyn mientras cu t’abo ta den Gobierno. Pues Gerlien mester demostra awor cu e por y cuminsa goberna pa caba” e partido ta finalisa bisando.