Croes: Gabinete anterior ta post video bunita, pero no a cumpli cu acuerdo cu Hulanda

ORANJESTAD – Mientras cu gobierno anterior ta post bunita video riba rednan social, e realidad ta cu ta gobierno anterior ta esun responsabel cu e rijkswet nobo no ta cla ainda. Asina e minister di partido FUTURO, mr Gerlien Croes a bisa riba su pagina di Facebook diabierna. “ Bunita videonan nos ta wak ultimamente di e gobierno anterior” sra Croes ta cuminsa bisa. Acerca e ta pone e texto di e landspakket como  como recordatorio “cu ex-Prome Minister dia 13 di november 2020, a firma un Rijkswet pa Aruba y 4 aña y 3 luna despues, no a cumpli cu su propio acuerdo firma cu Hulanda” e mandatario ta sigui bisa riba su pagina.

MAXIMO ESFUERSO

Ademas sra Croes ta sigura cu ta desde comienso di Gabinete AVP-FUTURO dia 28 di maart, hunto cu colega Geoffrey Wever y Prome Minister Mike Eman, “nos ta haciendo nos maximo esfuerso pa "haal in" y drecha locual gobierno anterior a laga atras”, sra Croes ta sigui bisa. “Aunke tawata tin retraso di e rapport di IMF bao di encargo di ex-Prome Minister, toch nos lo zorg pa di banda di Aruba como gobierno nobo, entrega tur lo necesario na Hulanda pa cumpli cu e deadline di 1 di mei 2025”.

Mester bisa si, cu e loke cu e gabinete kier entrega awor, no ta suficiente pa convence gobierno Hulandes pa no cambia e tasa di interes. Algo cu e colega minister di e mesun partido FUTURO, Geoffrey Wever tambe a confirma un dia prome.”  Diamars awo lo nos responsabilisa den Parlamento di Aruba y pronto tambe duna claridad riba tur locual nos a bin topa cu ne” mr Croes ta finalisa bisando. 

.