Cft no ta compronde con gobierno di Corsou ta hunga tanto cu sifra

WILLEMSTAD - Resientemente e Kolegio pa Supervishon Finansiero (Cft) a dirigí un karta na Minister di Finansa, drs. Javier Silvania, komo reakshon riba su di kuater reportahe di implementashon. Den su introdukshon e kolegio ta bisa ku e reportahe akí ta indiká ku por lo pronto tin un surplus den e servisio ordinario di XCg. 142 mion. Ku esei Kòrsou ta kumpli ainda ku e normanan sentral di presupuesto ku ta señalá den e Lei di Reino pa supervishon finansiero riba Kòrsou i St. Maarten i e kompensashon dje défisit ku ta ser eksigí. E surplus akí lo tin di ser ahustá konsiderablemente pa motibu ku ainda Kòrsou tinku prosesá e entrada i gastunan adishonal. Despues di prosesá e entrada i gastunan akí Kòrsou ta spera ku finalmente e lo yega na un surplus di XCg. 63 mion. Ta di sumo importansia ku Kòrsou realmente ta logra e resultado akí, pa motibu ku e surplus ei lo tin di bai kubri e défisit di XCg. 62 mion riba servisio di kapital.

Segun Cft den su karta firmá pa e presidente sra. Lidewijde Ongering, e ta hasi un apelashon riba Kòrsou pa aktualisá e resultadonan di tantu servisio ordinario komo esun di kapital pa final di 2024 den e promé reportahe di implementashon di 2025. I den esaki pais lo tin di splika kon lo por surpasá di tin un défisit riba presupuesto di 2024.

Mas aleu Cft ta bisa ku na luna di mart 2025, el a risibí den kuadro di e proseso di reakshon i kontra-reakshon riba presupuesto di 2025, e pronóstikonan di likides di Kòrsou i den kual tin diferente senario prosesá pa loke ta e bononan ku ta terminá den 2025. Cft a ekspresá su dudanan pa loke ta realidat di e pronóstikonan di likides ei pa motibu ku tabata falta diferente gastu di kapital. Cft ta ripití su petishon pa aktualisá e pronóstikonan akí mas pronto posibel, pa asina e por duna un opinion na drechi riba e posishon di likides di pais i di e fiansanan inkluí den presupuesto.

KONSEPTO DI KAMBIO DI PRESUPUESTO:

Segun Cft, Kòrsou ta poné den su di kuater reportahe di implementashon 2024 banda dje presupuesto 2024 ku a keda aprobá. Cft a duna su konseho na yüni 2024 riba e konsepto di kambio di presupuesto 2024, pero e konsepto di kambio ei no a ser entregá na Parlamento pa aprobashon. Pa no papia mes di esun di 2023 ku tampoko a bai Parlamento.

Segun Cft, pa medio di esaki e tin di mustra ku ta minando e derecho di presupuesto (‘budgetrecht’) di Parlamento i ta enfatisá ku mester aprobá e kambionan na tempu.

Stipulashon na tempu no solamente ta duna un bista riba e situashon finansiero aktual di pais, pero ta kontribuí tambe na un mehorashon dje legalidat tras di akshonnan finansiero. NOTA: Texto ta scirbi den Papiamento fonetico di Corsou.