Croes: DIMP tin te dialuna pa saca carta nobo pa de Meza sino ta entama caso sumario

ORANJESTAD – Departamento di Impuesto (DIMP) tin te dialuna atardi awor, 28 di April 2025, pa 3’or di atardi pa presenta un documento nobo di Mike de Meza, uno positivo,  pa loke ta e ‘fiscaal gedrag’ di e parlamentario. Asina su abogado mr. Desiree Croes a confirma na noticiacla diahuebs anochi. Si DIMP no cumpli, e ora e abogado lo entama un caso sumario contra di DIMP. 

INFORMACION NOBO

Segun Croes, awor cu DIMP tin informacion nobo, y tur prueba entrega di parti di su cliente, DIMP mester por saca un ‘verklaring omtrent het fiscal gedrag’ nobo, y esaki mester ta uno cu ta positivo. Cu e declaracion aki, e ta habri caminda pa su cliente e ora por bira minister. 

E CASO SUMARIO

MIentras cu e intencion ta pa bay corte si DIMP no cumpli, e abogado no ta kere cu lo yega asina leu. Esaki mirando cu e splicacion cu a duna na DIMP awor ta amplio di e asuntonan di de Meza, cu ta kita tur argumento di DIMP for di mesa. E caso, si toch e mester tuma lugar, lo ta e ora contra DIMP pues, segun e abogado a sigui bisa atrobe. 

DECLARACION DI EMAN

Tabata diahuebs atardi tempran despues di e audiencia di premier Mike Eman na gobernador, SE Alfonso Boekhoudt, cu e la indica cu e caso di parlamentario de Meza, por bay termina te den Corte. Esaki pasobra segun sr Eman, e parlamentario ta insisti cu e ta corecto y cu DIMP ta actuando incorecto riba su asuntonan fiscal, cu ta strobando sr de Meza di bira minister pa e gabinete AVP-FUTURO. Mientras cu ta Eman ta esun cu mester dicidi awor kico ta pasa cu de Meza, e la opta pa laga de Meza coi e caminda di Corte pa dicidi e asunto aki. Mientrastanto tur cos ta keda status quo.