Eman: Situacion di de Meza por termina dilanti mesa berde!

ORANJESTAD – E ‘caso’ pa parlamentario Mike de Meza por bira minister, por termina den corte. Esaki tabata e mensahe cu premier Mike Eman a duna prensa diaranson despues di su salida for di su audiencia cu Gobernador SE Alfonso Boekhoudt. E bishita no a trece claridad si sr de Meza por bira minister of no, sino mas bien a alarga e asunto solamente. Esaki ta crea mas rumor, mas tension, y mas problema. Y den cuadro di esaki tambe, sr Eman a opta pa como lider di partido, mustra su sosten incondicional na colega de Meza, alagando e persona y mustrando cu e tin sosten completo di e partido. 

BAY CORTE

Segun Eman, mescos cu e bishita ultimo, e biaha aki tambe e la entrega documentacion fiscal di sr de Meza, cual nan a ricibi siman pasa diahuebs, despues cu a pone ultimatum pa ricibi aun mas informacion. Aki Eman a confirma cu tin un discrepancia entre fiscalistanan di departamento di impuesto (DIMP) y fiscalistanan cu ta acesora de Meza. Loke a hala atencion ta cu sr Eman a hasta bisa cu e ta kere cu e caso aki, si no bin claridad liher, por bay termina den corte, unda cu e intencion ta pa laga Corte dicidi e asunto aki. Cu si esaki ta suficiente pa si laga sr de Meza bira minister, no ta conoci. 

PASA E BATAYA PA CORTE

Cu esaki tambe, a bira cla cu sr Eman no kier tuma e decision cu e tin cu tuma, esta di dicidi ken otro ta bira minister, sino cu e ta laga Corte dicidi esaki, y cu e decision di corte, usa esey como e ‘backup’ pa basa su decision final riba e asunto di de Meza. Algun fiscalista a sugeri na Noticiacla cu bayendo corte, no ta e caminda corecto pa cana, ya cu e ta algo fiscal. Loke mester haci ta pa apunta un hende (temporal) como minister, cu aprobacion di sr de Meza, mientras cu sr de Meza ta bringa esaki fiscalmente pa medio di un obhecion contra DIMP (bezwaar). Esaki no ta algo cu Corte tin cu dicidi, y por bien ta cu Corte por dicidi cu e no ta esun ‘indica’ (bevoegd) pa tuma tal decision y cu e ley ta hopi cla y cu e declaracion di DIMP, no ta keda lugar pa interpretacion. Pero, loke cu sr Eman y de Meza kier logra, ta pa Corte e ora duna e intepretacion final den e asunto fastioso aki. Tur e tempo, tin un persona cu tin mas cartera cu e mester atende, cu tur su consecuencia cu esaki por tin.