Mike Eman: Proximo paso ta pa papia cu de Meza y despues dicidi

ORANJESTAD – Premier Mike Eman tin cu papia cu candidato minister Mike de Meza, y despues ta comparti kico lo pasa cu e caso di e posicion di minister pendiente. Asina e mandatario a bisa despues di a sali di su combersacion cu gobernador SE Alfonso Boekhoudt diamars merdia. E mandatario a comparti e documentacion ricibi ayera di DIMP riba e caso di candidato de Meza cu gobernador, y awor ta toca turno pa e mes papia cu sr De Meza pa despues sali afo y bisa kico lo pasa. Mas e no por a divulga. Esaki tabata un Mike Eman hopi cuidadoso, midiendo cada palabra, y creando asina mas pregunta envez di claridad cu tabata spera di dje. 

DURA MAS LARGO

Loke a compronde, ta cu tin cu warda un tiki mas ainda, prome cu haya claridad riba kico ta pasa cu de Meza, y pa por contesta e pregunta miyonario, esta cu si e ta bira minister ainda si of no. Tambe ta hopi cla cu e decision cu tin cu wordo tuma, ta den scochi di sr Eman, y niun hende mas, y esey lo tuma lugar despues cu e papia cu candidato minister de Meza. Ki dia esey lo pasa no ta conoci. Noticiacla a purba saca afo si ta awe, of mayan, pero e mandatario a keda misterioso y bisa solamente ‘pronto’. 

PASENSHI

Loke tambe ta un pregunta awor, ta si de Meza tin mas pasenshi, y ta dispuesto pa laga e asunto aki bay mas dia. Siman pasa ainda e la bisa cu e kier pa e siman aki cos keda cla, y hasta a indica cu posiblemente dialuna ultimo tabata e deadline. Despues Noticiacla a compronde di su fuentenan cu awe, despues di e reunion entre sr Eman y gobernador, cu e lo a tuma su decision. Pa aworaki, manera cu sr Eman a bisa, mester warda, duna partidonan espacio, pa por sali for di e asunto aki.