Na Corsou a presupuesta menos cen pa salario di parlamentario i personal

WILLEMSTAD - E suma ku Parlamento ta reservá riba presupuesto pa gastu di personal ta baha na 2026. Esaki ta e gastu di salario pa miembronan di parlamento, kolaboradónan di frakshon i personal di ‘griffie’. Na 2024 tabatin un suma di 8,1 mion florin reservá, pero na 2026 esaki lo ta 7,7 mion.

‘Griffier’ di parlamento, Silvin Cijntje ta bisa ku realisashon di presupuesto 2024 a mustra ku a usa ménos ku a presupuestá. A presupuestá den 2024 8.1 mion florin na gastu di personal, pero a usa solamente 6,8 mion florin. Esaki apesar ku den 2024 tabatin oumento i indeksashon di salario, Cijntje ta splika.

Ta a base di e realidat aki ku riba presupuesto 2026 a disidí di pone un suma promedio di 1,7 mion florin riba presupuesto pa kubri gastunan di personal. Segun ta kalkulá, Cijntje ta sigui bisa, e suma aki lo ta sufisiente pa kubri tur gastu di personal inkluso e kolaboradónan èkstra ku frakshonnan por nombra manera komishon di asuntunan doméstiko di parlamento ta proponé. E proposishon aki ta enserá ku, dependé di e kantidat di asiento ku un frakshon tin, e por nombra te un máksimo di 6 kolaboradó.

Pa e próksimo periodo parlamentario ku ta inisiá 11 di mei awor, e kantidat total di kolaboradó lo ta mas òf ménos igual kompará ku otro añanan. Mirando e areglo nobo e máksimo kantidat di kolaboradó lo ta 13. Frakshonnan di PAR i MAN-PIN por nombra 2 kolaboradó, frakshon di PNP por nombra 3 kolaboradó i frakshon di MFK por nombra 6 kolaboradó.

EDIFISIO

Pa loke ta edifisio di parlamento, Cijntje a bisa ku ainda no tin un desishon final riba e trayekto ku ta bai kana pa un edifisio nobo pa parlamento. E komishon temporal ku a lanta pa trèk e trayekto aki a hasi diferente trabou kaba i ta spera ku e komishon lo finalisá su rapòrt promé ku e periodo parlamento nobo inisiá. Te ainda e rapòrt ta na konsepto, pero ya kaba tin sierto aspekto ku ta bisto kaba, Cijntje a sigui bisa. Un di nan ta si den kaso ku parlamento disidí wak su propio edifisio nobo, e gastunan pa realisá esaki lo ta riba 20 mion florin.

Ta den e kuadro ta kuminsá reservá sèn pa e proyekto aki for di 2026. Ta trata di un suma di 7,5 mion florin. Lo aloká e fondonan den 3 fase, pues riba presupuesto 2027 i 2028 tambe. Den tres aña pues alrededor di 22,5 mion florin.

BIAHE

Pa 2026 parlamento ta sigui subi su presupuesto di biahe. Cijntje ta bisa ku a nota ku den pasado tabata presupuestá sèn di ménos. Tambe ta tene kuenta ku preis di pasashi i gastunan di e miembronan mes a subi. Pa e motibu aki ta presupuestá pa 2026 880 mil florin pa biahe, loke ta igual ku e suma presupuestá na 2025. 660 mil florin ta dediká na biahe di miembronan, 109 mil florin na biahe di presidente di parlamento i 111 mil florin pa personal di griffie ku ta kompaña e miembronan i presidente riba nan biahenan. NOTA: Texto ta scirbi den papiamento fonetico di Corsou.