Presidente di Corte a lamenta cu formadornan no a scucha Corte durante session cu stakeholders

ORANJESTAD – Durante e session di combersacion di e dos ex formadornan Eman y Croes cu stakeholdernan recientemente, un stakeholder cu no a wordo invita, ta Corte di Husticia. Algo cu e presidente di Corte Comun mr Mauritz de Kort a informa diabierna durante e instalacion di e vice presidente di Corte Comun, mr Jane Jansen. Durante su discurso, e no a omete e ‘fayo’ aki tampoco y a dedica atencion na e omission importante aki. 

NO A INVITA CORTE DI HUSTICIA

Segun de Kort, Corte tambe tabatin derechi di wordo scucha. Pero e la haci esaki cu hopi tactica! “ Mi lo conclui cu un nota chikito na pia di página, cu tambe ta concerni e derecho di wordo scucha” e magistrado a cuminsa bisa. “E gobierno nobo di Aruba ta den e blokinan di salida. E ta hasi esei cu ambicion, specialmente ora ta trata di bienestar den e cadena di husticia”. Y despues e la bay p’e:’ “Den e tempo recien, e partidonan politico negoshado a tene combersacionnan conduci cu varios institucion y organisacion for di sociedad. Lamentablemente Corte no a wordo invita pa haci esaki” mr de Kort a sigiu bisa. Segun de Kort, claro cu ta pa bo mesun bienestar ta hopi agradabel ora bo ta sinti scucha. Segun e magistrado, e kier a comparti algun desaroyo positivo cu e coalicion nobo. “ Y naturalmente, Corte tambe semper tin un cantidad di deseo pa e legislador. Considera sugerencianan pa cambionan legislativo cu lo afecta legislacion di Aruba y cu por a wordo mas harmonisa dentro di Reino. Como un poder hudicial independiente, nos tabatin un rol valioso den e proceso aki por contribui na bon legislacion y bon gobernacion, y asina na bienestar di henter e comunidad Arubano” e magistrado a sigui bisa. E la termina e parti aki, bisando cu e tabata contento di por a mira tanto parlamentario como ministernan presente na e evento di diabierna. No ta conoci si e la logra tene e combersacionan cu esnan presente.