Na Corsou, Cft a pone ultimátum pa Minister di finanza Silvania

WILLEMSTAD - Resientemente e Kolegio pa Supervishon Finansiero (Cft) a dirigí un karta na Minister di Finansa (demishonario), sr. Javier Silvania, komo parti di su reakshon riba presupuesto di 2025 di Pais Kòrsou. Cft ta bisa ku dia 30 di yanüari 2025 el a duna un konseho riba e presupuesto ku a keda aprobá pa 2025. Cft a haña ta importante pa a adoptá diferente kambio den esaki pa mantené esaki denter dje liñanan di normanan di e Lei di Reino pa supervishon finansiero riba Kòrsou i St. Maarten. Den esaki Cft a duna sinku rekomendashon i a konsehá pa prosesá esakinan den un (konsepto) kambio di presupuesto. Tambe Cft a pidi pa, pa mas tardá 13 di febrüari 2025, duna un indikashon kon Kòrsou lo bai duna kontenido na e rekomendashonnan ei. Desviando for di e término legal pa reakshoná, Cft a risibí un reakshon dia 11 di mart 2025.

REAKSHON DI CFT:

Segun Cft den su karta firmá pa e presidente sra. L. Ongering, for di e reakshon dje minister ta parse ku parsialmente Kòrsou ta duna kontenido na e rekomendashonnan den presupuesto. Dor di esaki e opinion di Cft riba presupuesto 2025 ta keda igual. Kòrsou mester prosesá e kambionan den presupuesto pa mantené esaki denter dje liñanan di norma di Cft. E reakshon di minister ta duna mas motibu pa un kambio den presupuesto, teniendo kuenta ku Kòrsou lo no bai fia mas pa invershonnan di kapital.

Mas aleu tambe Cft a mustra riba gastunan ku a ser hasí den e promé kuartal, manera pago di ‘Bashi premi’, pero ku no a ser inkluí den e presupuesto.

Tambe Cft ta bisa ku e ta keda pendiente dje solushon ku tin pa CMC i e palabrashon ku minister mes a hasi bisando ku pa fin di mart 2025 e lo informá riba un solushon adaptá. Esaki ta di sumo importansia, teniendo kuenta ku e demas riesgonan ku tin pa e presupuesto di pais i pa motibu ku prosesamentu dje solushon ta kanando pa un tempu kaba.

KONTINUASHON:

Cft ta bisa ku e ta hasi un apelashon riba e minister pa, pa mas tardá 1 di aprel 2025, pues mañan, e duna un reakshon i pa mas tardá 13 di mei 2025 e entregá un konsepto di lei riba kambio dje presupuesto i na mes momentu e reportahe di implementashon riba e promé kuartal di 2025. Denter dje término aki Cft lo buska konekshon ku e solushon adaptá pa CMC i e konsiderashon pa stipulá un presupuesto kambiá despues di e promé kuartal di 2025.

Segun Cft a base di reakshon di e minister, en todo kaso e konsepto di lei riba kambio di presupuesto lo mester enserá lo siguiente:

E konsekuensianan finansiero di e solushon adaptá pa CMC;

Aktualisashon di e servisio di kapital, partikularmente pa e invershonnan planiá den 2025 i e (posibel) fiansanan;

Un kalkulashon revisá di loonbelasting i un kalkulashon aktualisá di ‘schommelfonds’;

Un redukshon di e presupuesto di mas aña pa loke ta gastunan di personal.NOTA: Texto ta scirbi den Papiamento fonetico di Corsou.