A confisca brommer usa pa trece trafico y bida di hende na peliger

ORANJESTAD – Riba ordo di fiscal, polis a kita e brommer for un motorcicilista cu na December ultimo a trece trafico y bida di hende na peliger. Cuerpo Policial a bisa di no lo tolera ningun maniobra riba camindanan publico, cu por pone e trafico y bida di hende na peliger. 

DECEMBER

Tabata den luna di december, via media social, cu hende por a mira un drifting di brommer cu a tuma lugar durante un evento di car show banda di Watty Vos Blvrd. Durante e evento un cabayero riba su brommer a drift meimei di e publico, unda a dal un mucha manda laira cu e brommer sigi drift y asina trapa pia di mas hende. 

A sigi tuma nota cu e mesun persona cu e mesun brommer a sigi haci diferente drifting ariba varios caminda di Aruba, poniendo e trafico y bida di hende na peliger pa su maniobranan cu ta contra ley y seguridad di trafico. 

Cuerpo Policial no a laga esaki continua y a cuminsa  un buskeda pa e manehador y e brommer. Riba ordo di fiscal, a kita e brommer for di e persona. Cuerpo Policial no lo tolera ningun maniobra riba camindanan publico, cu por pone e trafico y bida di hende na peliger. 

Agente Policial di Unidad Motorisa y departamento di Trafico lo sigi atende cu casonan asina y lo actua riba esnan cu ta pone e trafico y bida di hende na peliger.