Cinco aña pasa awe, Aruba a raporta su prome caso di Covid19

ORANJESTAD – Awe ta 5 aña pasa cu Aruba a raporta su prome caso di Covid19, riba 13 di maart 2020. Algun dia despues, Aruba a cera porta pa mundo, pa 3 luna, causando un crisis severo cu a pone cu mester a ricibi ayudo di Hulanda pa por a saca nos mes for di e situacion financiero malo causa pa e crisis. Aruba a conoce miles di caso (44.911 entre 2020 y 2025) y centenares di morto (256 entre 2020-2023, cifra di 2024-2025 no ta cla ainda), a consecuencia di e virus aki. 

PASO DRASTICO 

Gobierno di Aruba mester a tuma pasonan drastico pa yuda salba tur ciudadano di e  pandemia cu a bati na porta di tur pais rond mundo. “Nos isla chikito no tabata un execepcion pero hunto nos a enfrenta e pandemia y nos a surpase. Danki na esfuerso di cada ciudadano cu a keda den union y positivo cu awe, 5 aña despues nos a recupera di e pandemia cu ta keda marca den historia di Aruba” prome minister di Aruba Evelyn Wever Croes a recorda awe mainta. “Su efecto semper lo keda, sinembargo nos ta saliendo mas fuerte y resiliente di dje”.