Menu

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Ley di Screening: Un tiger di papel?

Scirbi pa Tito Laclé

Faltando un dia pa nos ‘posiblemente’ tende kende tur ta poni pa bira minister proximamente di e gabinete siguiente, ta bon pa ilustra kico tur ta envolvi pa laga e candidatonan realmente bira minister. Loke ta mei mei, ta e pa awor tan papia ‘afamado’ ley di screening, cu lo mester ta asina rigoroso cu bo mester ta casi un ‘super persona’ pa por bin na remarke pa e funcion. Tin cu lo bisa cu bo solamente mester actua corecto y cla, y nada di super persona. Pero e realidad ta cu e ta zona, como si fuera bo mester ta ‘superclean’. E la crea asina hopi speculacion cu tin hasta hende ta ‘bet’ cu otro ken si y ken no. Y toch, bo lo ripara despues di e analisis aki, cu e ley, por bien ta nada mas cu un simple ‘tiger di papel’.  Laga mi cuminsa splica pa bo compronde mi punto. 

E LEY

E ley di screening di candidatonan pa minister di Aruba, cu ta data for di december 2021, su meta ta pa garantisa un cierto nivel di integridad halto, competencia necesario y confiabilidad di candidatonan, prome cu nan wordo nombra como minister di un gabinete. Manera mi a bisa caba, por a scucha politiconan bisa cu e ley ta “rigoroso” y te hasta “esun di mas rigoroso den Reino Hulandes”. Pero ,- y esaki ta un pero grandi -, e pregunta ta si e ley, en bes di ta un arma contra corupcion (manera el a wordo bendi), no ta djis den forma di bisa… un simpel‘tiger di papel’.

RIGOROSO REAL?

Pa analisa esaki, ta bon pa considera e diferente componentenan di e screening, pa cual cada un tin su propio meta:

⁠  ⁠E investigacion hudicial ta controla si e candidato tin un strafblad of ta (of a) aparece como sospechoso den un investigacion pa actividadnan ilicito. ⁠  ⁠E investigacion di seguridad nacional ta determina si e candidato ta forma un risico pa e seguridad nacional. ⁠  ⁠E investigacion fiscal ta investiga e comportacion di e candidato pa cumplimento cu e obligacionnan di impuesto y di pago di prima, sea di su mes of di e negoshinan cu e (taba)tin riba su nomber of cu e (taba)ta maneha e ultimo 5 añanan. ⁠  ⁠E investigacion di transaccionnan inusual ta controla si e candidato (taba)ta involvi den transaccionnan financiero inusual, cu por ta indicativo pa labamento di placa of financiamento di terorismo. ⁠  ⁠E chekeo medico ta evalua e salud fisico y mental di e candidato. ⁠  ⁠E investigacion door di e Formador ta analisa e informacion ricibi di e candidatonan y di e departamentonan envolvi. 

HENTER UN WASLIJST

Riba su mes, e screening tin henter un ‘waslijst’ di rekisito, cu ta e motibo di e ‘tardansa’ di e proceso. Pa pasa tur e 7 candidatonan (y posibel backup en caso un candidato no pasa e screening prome) door di esaki, ta tuma su tempo, si realmente bo kier haciele manera mester. Y sigur no ta yuda, cu e formadornan a tarda hopi pa entrega e lista, debi cu internamente mes, nan tabatin retonan di ken si y ken no pa pone. Esaki a conta pa e partido berde. 

ANALISA E LEY

Te cu awo, mester bisa cu e investigacion di e formador no a haya atencion den prensa. Si analisa e ley bon, (y awor bo por cuminsa compronde e parti di e tiger di papel!!) por observa cu Procurador General (PG) ta contesta e pregunta si e persona tin un strafblad of ta aparece como sospechoso den investigacion. PG NO ta indica si un persona ta ministeriabel. Di e investigacion den cuadro di seguridad nacional, e hoofd di Veiligheidsdienst Aruba, ta duna un informacion cu por ta relevante tocante e candidato, incluyendo ki transaccionnan inusual e tin tras di su nomber. Hoofd VDA NO ta indica si e candidato ta ministeriabel. Di e investigacion fiscal, e inspector di belasting, ta duna un opinion (“oordeel”) di e comportacion fiscal di e persona. Director di SVB ta duna un opinion general (“algemeen oordeel”) di e comportacion di pago di prima (premiegedrag) di e candidato. Y finalmente, Ontvanger di belasting ta duna un opinion general di e comportacion di pago di impuesto y prima. Ni e inspector, ni e director di SVB, ni Ontvanger, ta conclui si e persona ta ministeriabel. Di e chekeo medico, por resulta cu mester haci ahuste na e life-style of luga di traha, pa e persona por funciona debido. E dokter y psicologo NO ta bisa si un persona ta ministeriabel.

FORMADOR MES

Asina nos ta yega na e investigacion cu e formador mes mester haci. Y esaki ta e parti mas importante porta: Ta e formador cu ta dicidi cu e NO ta promove nombracion di un candidato como minister na Gobernador di Aruba, den caso cu:  

a. E nombracion segun opinion di e formador, no ta compatibel cu e resultado di algun investigacion menciona aki riba;  

b. E formador no ta di acuerdo cu e palabracionnan e (!) a haci cu e candidato pa pone su interesnan comercial ariba distancia, of e areglo di pago cu e candidato a cera cu DIMP pa pago di belasting (y prima);  

c. E formador no ta di acuerdo con e interes comercial, funcion of trabou secundario di miembro di famia di e candidato, a wordo poni na distancia cu por crea posibel conflicto di interes;  

d. E candidato a wordo condena pa un delito (den un periodo di ocho aña prome cu e nombracion);  

e. E candidato ta sospechoso den un investigacion criminal andando;  

f. E candidato no a tuma medidanan pa pone su interes comercial riba distancia (of no ta declara ki funcion/trabou secundario e tin);  

g. E candidato no a tuma medidanan pa e pago di impuesto (of primanan), of pa cera un acuerdo.  

E RABO A CUMINSA KRUL CABA?

Aki ta unda e rabo di porco ta krul: si un candidato no ta sospechoso (di un investigacion actual) y no a ricibi un condena pa un delito (den ultimo 8 aña), TA E FORMADOR finalmente toch ta esun cu ta dicidi si e ta satisfecho cu e areglonan haci of pasonan tuma door di e candidato pa remedia su situacion cu a resulta di cualkier di e investigacionnan. Si e persona ta mal pagado mes di belasting y awo a core cera un areglo di pago, TA E FORMADOR ta dicidi si e ta satisfecho cu e areglo cera. Kiermen, ta solamente nombracion di un candidato condena of sospechoso na e momento aki, Gobernador di Aruba lo por evita pa pasa. Den TUR otro caso, ta e formador - segun su compas moral of consenshi- ta husga si e persona ta ministeriabel of no, y lo por hasta persisti pa Gobernador huramenta e persona. Esey lo no ta un acto contra ley di su banda, y den tal caso ta keda solamente un asunto di diferencia di opinion entre e formador y e Gobernador, pasobra ‘ley ta permiti esaki’. E Gobernador tin solamente un instrumento den man, si e formador propone algo “contra ley”. 

FANFARIA COMPLETO

Pues, realmente henter e fanfaria di cu e ley nobo di screening ta asina  “rigoroso” of “pisa”, e realidad sunu, ta cu tur cos ta depende di e compas moral (consenshi) di e formado. Si e ta haya cu ta bon loke e candidato pa minister a haci como areglo cu DIMP/SVB of a palabra cu ne mes, e por persisti na nombra e persona como minister. Dus realmente, e tin e ultimo palabra. Y e parti ‘rigoroso’, ta disparce. Bo por hasta bisa cu henter e sistema di investigacion y control ta mes fuerte cu e formador su caracter di liderasgo y curashi pa impone of ehecuta e intencion di e ley. Sentido comun y etica moral, ta siña nos cu bo NO por ta arbitro y hungado pareu. Of bo ta un, of e otro. Awo nos ta sinta cu un arbitro cu ta lider di e “team” y ta hungado na mes momento! Pues, si ningun candidato ta sea un sospechoso di ley, no mester tin problema pa e bira minister. Ni con rigoroso e ley nobo ta. Y ken lo mester cambia e sistema pa haci’e mas husto? E mesun arbitro cu su team. P’esey lo no ta nada straño si e ley di screening di minister keda un tiger di papel! E formador en cuestion, cu tur respet pa su persona, por evita mas confrontacion interno y laga cos bay liher. Of net pa mustra cu e ta ‘the man’, e por tuma e rumbo cu mester. Ban spera. In any case, pa ‘suerte’, nos speransa ta e echo cu e biaha aki nos dos formador, of ‘arbitro’: un di cada team! E palabra ta, ken lo tin mas poder aki. Y si esaki, e consenshi por persigui e arbitro den e proceso. Tik tok. Diahuebs nos ta haya sa.